თბილისის სახელმწიფო უნივერსიტეტში დღეს დილიდან პროტესტის ახალი ტალღა დაიწყო.
აუდიტორია #115 წევრებმა უნივერსიტეტის მე-6 კორპუსიდან ბანერები გადმოკიდეს წარწერით, “ავტონომია უნივერსიტეტს”. პროტესტის მონაწილეები პრემიერ-მინისტრის მისვლას და კითხვებზე პასუხს ითხოვენ.
მათ უნივერსიტეტის VI კორპუსი დაიკავეს და 4-პუნქტიანი მოთხოვნები გამოაქვეყნეს.
“VI კორპუსი დაკავებულია შემდეგი მოთხოვნებით:
- უნივერსიტეტში სტუდენტთა წარმომადგენლობას უნდა ახორციელებდნენ საფაკულტეტო საბჭოებსა და სენატში არჩეული წევრები. ყველა სხვა სტუდენტური სტრუქტურა უნდა გაუქმდეს;
- დაუყოვნებლივ უნდა შეიცვალოს რექტორისა და აკადემიური საბჭოს არჩევის წესი, აკადემიური საბჭოს შემადგენლობა;
- ვითხოვთ პრემიერ-მინისტრის მოსვლას I კორპუსის #115 აუდიტორიაში (პირობითად 16:00 საათზე). მთავრობის თავმჯდომარემ პასუხი უნდა გასცეს კითხვებს:
– არის თუ არა მზად მმართველი ძალა, წინა ორ პუნქტში აღნიშნული ცვლილებების დაუყოვნებლივ გასატარებლად. კანონი ამ მოწვევის პარლამენტმა უნდა შეცვალოს!
– გატარდება თუ არა განათლებისა და მეცნიერების რეფორმა 2013 წელს შემუშავებული კონცეფციის მიხედვით; მზად არის თუ არა მთავრობა გარე რეგერირების მექანიზმის დასანერგად; რა იგეგმება უნივერსიტეტებში სწავლების ხარისხის ასამაღლებლად;
– გაიზრდება თუ არა უნივერსიტეტის დაფინანსება;
- ოდეერების საქმის გამოძიება.
შეგახსენებთ, რომ იგივე მოთხოვნებით უნივერსიტეტში აქციების ტალღა რამდენიმე ხნის წინაც იყო.