22 იანვარს საქართველოს პრემიერ-მინისტრმა, ირაკლი ღარიბაშვილმა, მთავრობის სხდომაზე განაცხადა, რომ „რესპუბლიკური საავადმყოფო დაინგრევა და მის ბაზაზე ახალი საავადმყოფო აშენდება“.
ამასთან დაკავშირებით, რესპუბლიკური საავადმყოფოს ექიმებმა 26 იანვარს, 3 საათზე ჯანდაცვის სამინისტროსთან საპროტესტო აქცია დააანონსეს.
მედიკოსების მთავარი მოთხოვნა ჯანდაცვის სამინისტროს მიერ მიღებული გადაწყვეტილების შეცვლაა.
„მეხის დაცემაა. არანაირ ლოგიკაში არ ჯდება ასეთი გადაწყვეტილება. ან ქრთამია აღებული, ან შეკვეთაა მიცემული, რომ აქ არ იყოს კლინიკა. პარასკევს ვაპირებთ, რომ მივიდეთ ჯანდაცვის სამინისტროსთან პროტესტის გამოსახატავად. ვითხოვთ, ჯანდაცვის მინისტრთან შეხვედრას“, – აღნიშნა ერთ-ერთმა ექიმმა.
მედიკოსები პროტესტის პერმანენტულ რეჟიმში გადადიან და ამბობენ, რომ მსოფლიოს ისტორიაში პირველი და უპრეცედენტო შემთხვევაა, როდესაც მთავრობა სახელმწიფო კლინიკას აპელაციის გარეშე ხურავს.
„ტენდერს დაჩქარებულ რეჟიმში ვატარებთო, კომპანია შემოვა, რომელიც მოახდენს ამ კონსტრუქციის ჯერ გამაგრებას და მერე დემონტაჟს დაიწყებსო. ფასადის დემონტაჟზე იყო მხოლოდ საუბარი და მეტი არაფერზე. ის გეგმებიც შევიმუშავეთ, რომ დემონტაჟის პირობებში იქითა მხარეს არ ეფუნქციონირებინა. მსგავსი პრეცედენტი მსოფლიოში რომ მოინდომო ადამიანმა ვერ იპოვი, რომ სახელმწიფომ სახელმწიფო კლინიკა ასე უაპელაციოდ დახუროს“, – განაცხადა პროტესტის მონაწილემ.