ოკუპირებულ აფხაზეთში მორიგი სკანდალია. ის ე.წ. მთავრობის მაღალჩინოსნებს უკავშირდება.
ჟურნალისტებმა მოიპოვეს დოკუმენტი, რომლის მიხედვითაც, ე.წ აფხაზეთის თავდაცვის სამინისტროს მაღალჩინოსნები უძვირფასესი მანქანებით გადაადგილდებიან.
მაგალითად, ე.წ. თავდაცვის მინისტრის სახელზე, სამინისტროს სახსრებით, ფიქსირდება 124 755 -დოლარიანი Toyota LC 200. გენშტაბის ხელმძღვანელსა და თავდაცვის მინისტრის პირველ მოადგილს შედარებით მოკრძალებული Toyota Land Cruiser Prado-ები ჰყავთ, რომლებიც 103 000 დოლარი ღირს.
ამ ინფორმაციაზე წერილს ავრცელებენ პოლიტიკური და საზოგადოებრივი ორგანიზაციები:
„გვინდა გაცნობოთ, რომ სოცქსელებით ჩვენს ხელში აღმოჩნდა დოკუმენტი, რომელიც თავდაცვის მინისტრმა, გენერალ-პოლკოვნიკმა ანუა ვ.ი-მ 2023 წლის 2 აგვისტოს დაამტკიცა.
დოკუმენტს ვაქვეყნებთ სასამართლო განცხადების მონაცემებით. ჩვენ ვიცით ვ.ი ანუასა და სხვა ოფიცრების მიღწევები აფხაზეთის სამამულო ომის დროს, მაგრამ როდესაც ადამიანები წყდებიან რეალობას და სურთ, 9-11-მილიონრუბლიან მანქანებით სიარული, ვთვლით, რომ ისინი ვერ ხედავენ რა მდგომარეობაშია ყაზარმული ფონდი, თავდაცვის სამინისტროს ჰოსპიტალი, და შეიარაღებული ძალების მატერიალურ-ტექნიკური მომარაგება. ძვირადღირებული მანქანების ყიდვის ნაცვლად, ჯობია თანამედროვე უპილოტო საფრენ აპარატებზე ფიქრი, რომელიც თანამედროვე ბრძოლის წარმოების პირობებში ასე აუცილებელია. ასეთ პირობებში ძალიან უადგილო და ცინიკურადაც კი ჩანს მთავრობის მცდელობები, რომ ჩვენს მეწარმეებს არმიის მოდერნიზების ფული მოსთხოვონ. უკანასკნელი ხმამაღალი ოპერაცია ვიღაც დივერსანტების წინააღმდეგ და ძალოვანი სტრუქტურების ურთიერთქმედება კიდევ უფრო იმედგამაცრუვებელია. ინფორმაციის არაკომპეტენტური მოწოდება არა მხოლოდ ჩვენი სახელმწიფოს მოქალაქეების დეზორიენტაციას ახდენს, არამედ ჩვენი სტრატეგიული მოკავშირეებისაც და ჩვენ ძალოვან სტრქტურებს იმიჯს უფუჭებს. ეს ძალოვანი ბლოკის ხელმძღვანელების დაბალ პროფესიონალიზმზე მეტყველებს. ამ სიტუაციამ გამოავლინა აუცილებლობა, რომ აფხაზეთის რესპუბლიკის თავდაცვისა და უსაფრთხოების სფეროში ძირეული რეფორმებია ჩასატარებელი“, – აღნიშნულია მათ მიერ გავრცელებულ ინფორმაციაში.
წყარო: AMBEBI.GE