უკრაინის პრეზიდენტი ვოლოდიმერ ზელენსკი აცხადებს, რომ რუსეთმა ზაპაროჟიეს ატომური სადგური ბრძოლის ველად აქცია და პუტინს გაცნობიერებული აქვს ამის შესაძლო შედეგები. ზელენსკის თქმით, რუსეთმა შესაძლოა, ისტორიაში ყველაზე მასშტაბური რადიაციული ავარიის პროვოცირება მოახდინოს.
“თუ საბჭოთა ხელისუფლება ჩერნობილის კატასტროფის და მისი შედეგების მიჩქმალვას ცდილობდა, რუსეთის ხელისუფლება გაცილებით ცინიკური და საშიშია – ის თავად აკეთებს ყველაფერს, რომ ბირთვული კატასტროფის რისკები მაქსიმალურად გაიზარდოს და ატყუებს მთელ მსოფლიოს, რომ ამაში დამნაშავე ვიღაც სხვაა”, – ამბობს ზელენსკი.
უკრაინის პრეზიდენტის თქმით, აუცილებელია, ევროპა ამ საფრთხისგან იქნას დაცული.
“ზაპაროჟიეს ატომური სადგური ყველაზე დიდია ჩვენს კონტინენტზე, მსოფლიოში კი სიდიდით მესამეა – ექვსი ენერგობლოკით”, – აღნიშნავს ზელენსკი და ამბობს, რომ რუსეთის საოკუპაციო არმია ამ ადგილს ტერორისა და შეიარაღებული პროვოკაციებისთვის იყენებს – “რუსეთმა ატომური სადგური ბრძოლის ველად აქცია. როდესაც ოკუპანტები ზაპაროჟიეს ატომური სადგურის ტერიტორიაზე შემოვიდნენ, ტანკებიდან მას ესროლეს. შეუძლებელია, რუსმა სამხედროებმა არ იცოდნენ, რომ მთელ ევროპას ბირთვული კატასტროფის წინაშე აკავებენ”, – განაცხადა ზელენსკიმ უკრაინის ჩრდილოეთ ევროპელ მოკავშირეთა კონფერენციაზე სიტყვით გამოსვლისას.