პარტია “ლელოს“ ლიდერები, მამუკა ხაზარაძე და ბადრი ჯაფარიძე კომპანია “ბორჯომთან“ დაკავშირებით განცხადებას ავრცელებენ. როგორც მასშია აღნიშნული, “ქართული ოცნების” წევრები ფაქტების გაყალბების გზით მოქალაქეების შეცდომაში შეყვანას ცდილობენ, თუმცა, მათ მიერ გავრცელებული ინფორმაცია სიცრუეს წარმოადგენს. ამასთან, ხაზარაძე და ჯაფარიძე აღნიშნავენ, რომ “ბორჯომის” განვითარების “ქეისი”, როგორც საბჭოთა წარმოების თანამედროვე კონკურენტულ საწარმოდ გარდაქმნის წარმატებული მაგალითი, დღემდეგ ისწავლება ჰარვარდის ბიზნეს სკოლაში.
“მეტრონომი” განცხადებას უცვლელად გთავაზობთ:
“ბორჯომის განვითარების ქეისი დღემდე ისწავლება მსოფლიოს ერთ-ერთ საუკეთესო უნივერსიტეტში, ჰარვარდის ბიზნეს სკოლაში, როგორც საბჭოთა წარმოების თანამედროვე კონკურენტულ საწარმოდ გარდაქმნის წარმატებული მაგალითი. მატყუარების პარტიის “ქართული ოცნების “ მატყუარა სპიკერების ვოლსკისა და ქადაგიშვილის, ასევე ბოტების და ტროლების ნებისმიერი მცდელობა ფაქტების გაყალბების გზით, შეცდომაში შეიყვანონ ჩვენი მოქალაქეები დასრულდება სრული მარცხით, რადგან ასეთი მცდელობები არის დანაშაულის ტოლფასი და მათ მიერ გავრცელებული ინფორმაცია წარმოადგენს უსინდისო სიცრუეს.
