პარლამენტის წევრი და პარტია გირჩის ერთ-ერთი ლიდერი, ჰერმან საბო სალომე ზურაბიშვილის მიერ ჯო ბაიდენის ინიციატივით გამართულ სამიტზე გაკეთებულ განცხადებას ეხმაურება.
მისი თქმით, ზოგადად, პრეზიდენტის განცხადება კარგია, რომ შერიგების აქტუალიზაცია მოხდეს, თუმცა კონკრეტულად შერიგება დამოკიდებულია დაპირისპირებულ მხარეებზე.
“შერიგებას ყველაზე მეტად ხელს უშლის შიში და ზიზღი. შიში – მიხეილ სააკაშვილის დაბრუნების და ზიზღი მის მიმართ, რომელსაც მისი ოპონენტები აღვივებენ. ან პირიქით, როცა ზიზღს ბიძინა ივანიშვილისა და მისი გუნდის მიმართ ოპოზიციური მედია აღვივებს. როგორ შეიძლება, ეს ორი კომპონენტი მოიხსნას? – შიში მოიხსნება მიხეილ სააკაშვილის პოლიტიკიდან ისევ ისე წასვლით, როგორც ეს ბიძინა ივანიშვილმა გააკეთა. შიში მოიხსნება, რომ მიშა დაბრუნდება და იმავეს გააკეთებს, რასაც ე.წ. სისხლიან ცხრა წელში აკეთებდა.
ზიზღი მაშინ მოიხსნება, როცა იმ მედიასაშუალებების რიტორიკა, რომლებიც დაკავებული არიან მეორე მხარის „გაშავებით“, შეიცვლება. „ქართული ოცნების“ რიტორიკაა, რომ მთავარი დამცავი ფარი არიან ქართველ ხალხსა და მიხეილ სააკაშვილის რეჟიმს შორის. თუ ეს საფრთხე მოიხსნება, მმართველი გუნდის ეს რიტორიკაც აზრს დაკარგავს და საკუთარი ამომრჩევლის მობილიზების აღნიშნული ფაქტორიც გაქრება. მგონია, რომ პროცესების ნორმალიზებას სჭირდება მთავარი დაპირისპირებული ადამიანების – სააკაშვილისა და ივანიშვილის პოლიტიკიდან ჩამოცილება”, – განაცხადა ჰერმან საბომ.