აშშ-ს სენატორის ჯიმ რიშის განცხადებით, საქართველოს მთავრობასა და ოპოზიციური პარტიის ლიდერებს შორის გუშინდელ შეთანხმებას, შეუძლია დააბრუნოს საქართველო ევროატლანტიკურ გზაზე.
“მოხარული ვარ, რომ შეთანხმება მოიცავს საარჩევნო და სასამართლო სისტემის რეფორმებს, ასახულია საპატიმროში მყოფი ორი პოლიტიკური პირის საქმეები, და რწმენას იმისა, რომ ოპოზიცია შეუერთდება პარლამენტს. ორივე მხარემ არ დაიშურა ძალისხმევა, გამოავლინა გამბედაობა, რათა მიეღწიათ კომპრომისისთვის ქვეყნისა და ყველა ქართველის სასარგებლოდ. ამ შეთანხმებას შეუძლია დააბრუნოს საქართველო ევროატლანტიკურ ტრაექტორიაზე.
კომპრომისის პოვნა იყო პირველი ნაბიჯი. ხელშეკრულების მდგრადობის ნამდვილი ტესტი იქნება მისი განხორციელება. ქართულმა ოცნებამ და ოპოზიციამ უნდა დაიცვან ეს შეთანხმება, რათა მოხდეს პოლიტიკური ნდობის აღდგენა. როგორც არაერთხელ მითქვამს, საქართველომ უარი უნდა თქვას პოლიტიკურ დევნაზე და ძლიერი და წარმატებული საქართველოს მშენებლობას შეუდგეს. ეს წაიყვანს ქვეყანას სწორი მიმართულებით, შეერთებული შტატები, მათ შორის, აშშ-ს კონგრესში საქართველოს მეგობრები, ყურადღებით დააკვირდებიან ამ პროცესს”,- ნათქვამია სენატორის მიერ გავრცელებულ განცხადებაში.