ახალქალაქის, კუმურდოსა და კარის მიტროპოლიტი, მეუფე ნიკოლოზი(ფაჩუაშვილი) აცხადებს, რომ ვაქცინაციასთან დაკავშირებით ეკლესია კამპანიას ვერ მოახდენს, რადგან მრევლის არჩევანი თავისუფალია და თავად უნდა გადაწყვიტოს, აიცრება თუ არა.
როგორც მეუფე ჟურნალისტებთან აცხადებს, მრევლი აიცრება თუ არ აიცრება კოვიდვაქცინით, ეს ზიარებაზე გავლენას არ მოახდენს.
ამასთან, მეუფე ნიკოლოზი ამბობს, რომ ვაქცინაზე ინფორმაციის ნაკლებობაა და დაავადებათა კონტროლის ეროვნული ცენტრის დირექტორს, ამირან გამყრელიძეს მოუწოდებს, “ასტრაზენეკას” ვაქცინის შესახებ საზოგადოებას მეტი ინფორმაცია მიწოდოს.
“ჩვენ ვერ ჩავერევით ამაში, ჩვენი მხარე, ჩვენი პასუხიმსგებლობა, რაც არის, გამოიხატება იმაში, რომ ჩვენ ადამიანებს თავისუფლებას არ შევუზღუდავთ, თუ აიცრება ადამიანი, ვაზიარებთ და თუ არ იცრება – ვაზიარებთ, აიცრა თუ არ აიცრა, ზიარებაზე ეს არ მოახდენს ზეგავლენას.
ერთი რამ მინდა ბატონ ამირანს ვთხოვო და ხელისუფლებასაც და მასმედიასაც, ჩაატარეთ საგანმანათლებლო გადაცემები, გაგვანათლეთ, შემოგვიტანეთ ინფორმაცია… ბრიტანეთის საიტებზე არ უნდა ვეძებდე მე “ასტრაზენეკას” შემადგენლობას. ბატონმა ამირანმაც და ხელისუფლებამაც უნდა მოგვაწოდოს… ერთი სიტყვა “ასტრაზენეკა” სულ არ არის საკმარისი იმისთვის, რომ გავიგოთ რაზეა ლაპარაკი, ზუსტი ინფორმაცია მოგვაწოდეთ, აგვიხსენით მოსახლეობას”, – განაცხადა მეუფე ნიკოლოზმა.
ცნობისთვის, დაავადებათა კონტროლის ცენტრის ხელმძღვანელმა ამირან გამყრელიძემ წმინდა სინოდს და მღვდლმთავრებს თხოვნით მიმართა, რომ ვაქცინაციის პროცესში დაეხმარონ. როგორც გამყრელიძემ აღნიშნა, ამ პროცესში თითოეულ მღვდელმთავრის და ექიმის როლი უმნიშვნელოვანესია, ვინაიდან საზოგადოებას მათ მიმართ ნდობა აქვს.
შეგახსენებთ, 15 მარტიდან საქართველოში კორონავირუსის საწინააღმდეგო “ასტრაზენეკას” ვაქცინაცია დაიწყო. ვაქცინის 43 200 დოზა ქვეყანაში 13 მარტს შემოიტანეს, რომელიც თავდაპირველად მედპერსონალისთვისაა გათვლილი.
15 მარტს, დაავადებათა კონტროლის ეროვნული ცენტრის ხელმძღვანელის მოადგილე პაატა იმნაძე, თბილისის ინფექციური საავადმყოფოს წარმომადგენლები მარინა ეზუგბაია და მარინა ენდელაძე, ასევე ექიმები კორონავირუსი საწინააღმდეგო ვაქცინით პირდაპირ ეთერში აიცრნენ.