“მინდა ვთხოვო მთლიანად წმინდა სინოდს, თითოეულ მღვდელმთავარს, მათი როლი ამ უმნიშვნელოვანეს პროცესში განსაკუთრებულია,” – აღნიშნული თხოვნით დაავადებათა კონტროლის ცენტრის გენერალურმა დირექტორმა, ამირან გამყრელიძემ საქართველოს მართლმადიდებელი ეკლესიის წმინდა სინოდს მიმართა.
ამასთან, გამყრელიძემ მზაობა განაცხადა ნებისმიერი სახის შეხვედრებისთვის და აღნიშნა, რომ მათთვის საქართველოს ეკლესიასთან თანამშრომლობა დიდი პატივია.
“მინდა ვთხოვო მთლიანად წმინდა სინოდს, თითოეულ მღვდელმთავარს, მათი როლი ამ უმნიშვნელოვანეს პროცესში განსაკუთრებულია. ბოლო 200 წლის განმავლობაში ვაქცინაციამ მილიონობით ადამიანის სიცოცხლე იხსნა. ვაქცინაცია არის მეცნიერულად დასაბუთებული და, მოგეხსენებათ, მეცნიერებას და ეკლესიას ყოველთვის აქვს სინერგიული დამოკიდებულება. ეკლესია ყოველთვის ეყრდნობა მეცნიერულად დადასტურებულ ფაქტებს და, სწორედ, ვაქცინაციის სიკეთე მეცნიერულად არის დადასტურებული, რომელიც გამოსცადა კაცობრიობის ისტორიამ.
ძალიან გთხოვთ, გვერდით დაგვიდგეთ ექიმებს ამ პერიოდში და ვითანამშრომლოთ, რადგან მოსახლეობას თქვენი ძალიან სჯერა. ბევრ შემთხვევაში, ექიმზე უფრო ძლიერ. ჩვენ მზად ვართ ნებისმიერი შეხვედრისთვის და ჩვენთვის დიდი პატივია საქართველოს ეკლესიასთან თანამშრომლობა. დარწმუნებული ვართ, ერთად მივაღწევთ სასურველ შედეგს,” – აღნიშნა გამყრელიძემ.
ცნობისათვის, საქართველოში კორონავირუსის საწინააღმდეგო ვაქცინის (ასტრაზენეკა) 43 ათასი დოზა 13 მარტს შემოიტანეს და მედპერსონალის ვაქცინაცია მიმდინარეობს.
შეგახსენებთ, 15 მარტს, დაავადებათა კონტროლის ეროვნული ცენტრის ხელმძღვანელის მოადგილე პაატა იმნაძე, თბილისის ინფექციური საავადმყოფოს წარმომადგენლები მარინა ეზუგბაია და მარინა ენდელაძე, ასევე პირდაპირ ეთერში სხვა ექიმებიც კორონავირუსი საწინააღმდეგო ვაქცინით აიცრნენ.