თბილისში ხვალ ჩინეთიდან წამოსული პირველი მატარებელი შემოვა. მთავრობის ადმინისტრაციის ცნობით, ინფორმაციით, პორტ ლიანიუნიანის ტერმინალიდან გამოსული მატარებელი ხვალ, 10:30 საათზე ჩამოვა თბილისში. ამ მატარებლის შემოსვლით ოფიციალურად გაიხსნება “აბრეშუმის რკინიგზა”.
საზეიმო ცერემონიაში საქართველოს პრემიერ-მინისტრი ირაკლი ღარიბაშვილი მიიღებს მონაწილეობას. მთავრობის მეთაური მატარებელს “საქართველოს რკინიგზის” გენერალურ დირექტორთან და ჩინეთის ელჩთან ერთად დახვდება.
მატარებელმა ჩინეთი, ყაზახეთი და აზერბაიჯანი გამოიარა. საქართველოს გავლით ის თურქეთში ჩავა.
“ეს არის პირველი ტრანზიტული ტვირთი და რეალურად განხორციელებული “აბრეშუმის გზის” პროექტი. სამომავლოდ ტრანზიტული მატარებელი უმოკლეს დროში დააკავშირებს აზია – ევროპას. ჩინეთის უკიდურესი აღმოსავლეთ ნაწილიდან, პორტ ლიანიუნიანიდან წამოსული ტვირთი სტამბოლში მაქსიმუმ 14-15 დღეში ჩავა, რაც საუკეთესო შედეგია იმ პირობებში, როდესაც გემს 40-45 დღე სჭირდება.
წლის ბოლომდე თბილისი კიდევ ერთ ტრანზიტულ მატარებელს მიიღებს, ხოლო 2016 წლიდან აღნიშნული პროექტის ფარგლებში დამატებით რამდენიმე ათასი კონტეინერის გადაზიდვა იგეგმება. პროექტით ქვეყნის სატრანზიტო პოტენციალი მნიშვნელოვნად იზრდება”, – აცხადებენ მთავრობის ადმინისტრაციაში.