aviabiletebi
ახალი ამბები ინტერვიუ კულტურა მთავარი

“არ შეიძლება არშემდგარი ადამიანი ამგვარ პროექტებს ატარებდეს”

aviabiletebi
ავიაბილეთები

კახა ცისკარიძე მეტრონომთან საახალწლო კონცერტის ორგანიზატორებზე საუბრობს

2016 წლის თბილისის საახალწლო კონცერტის მონაწილეთა სია უკვე ცნობილია. კონცერტის ორგანიზატორი კომპოზიტორი მიშა მდინარაძე გახლავთ.  როგორც „მეტრონომს“ დედაქალაქის მერიაში განუცხადეს, საკონცერტო პროექტების შესახებ კონკურსი არ უნდა გამოცხადებულიყო. ვინც იცოდა და შეიტანა პროექტი… მათგან ის შეარჩიეს, რაც მოეწონათ. „არტ ფორუმის“ დამფუძნებელი და მომღერალი, კახა ცისკარიძე, საახალწლო კონცერტების გარშემო რიგ დარღვევებს ხედავს. როგორც გამოცდილი ორგანიზატორი, „მეტრონომს“ საკუთარ შენიშვნებს უზიარებს.

„მეტრონომი“: კახა, მერიაში კონკურსის გარეშე მიიღეს ახალი, 2016 წლის თბილისის საკონცერტო პროექტი. თქვენ როგორ იღებდით სახელმწიფო დაკვეთებს კონცერტების ჩატარებაზე? 

კახა ცისკარიძე: ფაქტია, რომ მერიას ადრე ამგვარი პროექტების მიღებისთვის ძალიან რთული მოთხოვნები ჰქონდა. მაგალითად, ცხადდებოდა კონკურსი, ამ კონკურსში მონაწილე კომპანიების შეფასება ხდებოდა, თუ რა ჰქონდათ მანამდე გაკეთებული. სანამ სახელმწიფო ვინმეს სახალხო ზეიმის ორგანიზებას ანდობდა, ძალიან ბევრი საფეხური იყო გასავლელი, რადგან ორგანიზების მაღალი კლასი და გამოცდილება აუცილებელი გახლდათ.

– კონცერტის მონაწილეების პოლიტიკური ნიშნით შერჩევაზე საუბრობენ…

– ვერ ვიტყვი, რომ მთავრობიდან არის დაკვეთა მომღერლები პოლიტიკური ნიშნით შეარჩიონ, მაგრამ ფაქტია, რომ კონკრეტული ადამიანები, მათ შორის მეც, სამის წლის განმავლობაში სახალხო ზეიმებში მონაწილეობას არ ვიღებთ.

ნაწყენი პოზიციიდან არ ვლაპარაკობ. მე რომ არარეალიზებული ვიყო, ჩემი ჯგუფი „კახაბერი და ხანუმები“  რომ არ იყოს მოთხოვნადი, არ გვქონდეს გასტროლები და მოწვევები, ჩვენი ქვეყნის და ქართული მუსიკის პოპულარიზაციას რომ არ ვეწეოდეთ, კიდევ შეიძლება ჩაითვალოს რომ ნაწყენი ვარ. ახლა კი, უბრალოდ, როგორც მუსიკოსი, პროდიუსერი და კონცერტების ყოფილი ორგანიზატორი, პროფესიონალური თვალსაზრისით ვუყურებ და ვაფასებ ამ შემთხვევას.

– თქვენს მიმართაც არსებობდა პრეტენზია, რომ პოლიტიკური ნიშნით ირჩევდით მონაწილეებს კონცერტებისთვის.

– განსხვავებული აზრის გამო კონცერტში მონაწილეობაზე უარი არავისთვის გვითქვამს. ყველას ვუკავშირდებოდით. ამაზე ვერავინ იტყვის, რომ ეს ასე არ იყო. იმიტომ, რომ ამის ფაქტები არსებობს ელემენტარულად.

ჩვენ მიერ ორგანიზებულ კონცერტზე მონაწილეთა შერჩევა ერთი მიმართულებით არასდროს ხდებოდა. ვითვალისწინებდით რეიტინგებს, პოპულარობას, ამ ყველაფრის ხანგრძლივობას, აქტუალობას, საზოგადოებრივ ინტერესს და ა.შ. რაც მთავარია, ჩვენ მიერ ორგანიზებულ კონცერტებში ყველა მონაწილესთან გვქონდა კონტრაქტები. ეჭვი მეპარება, რომ დღეს ასე იყოს.

სახალხო გამოკითხვებს ვატარებდით, სანამ შევარჩევდით მონაწილეებს. სამი წელი რასაც ვხედავ, ეს ფორმა  არ არსებობს. ამ სამი წლის განმავლობაში არცერთ კონცერტში მონაწილეობა არ მიგვიღია ჩვენ, კახაბერს და ხანუმებს, მიუხედავად იმისა, რომ საზღვარგარეთ  გასტროლები მუდმივად გვაქვს.

ვიღაცას პრეტენზია ყოველთვის ჰქონდა. იყვნენ ისეთი ადამიანებიც, რომლებიც უცბად ხდებოდნენ პოპულარულები და მაინც უნდოდათ მსგავს ღონისძიებებში მონაწილეობა. მათ პოპულარობას მინიმუმ წელიწადნახევარი უნდა გაეძლო, რომ ასეთ ღონისძიებაში მონაწილეობა მიეღოთ. 20 წელი რომ პოპულარულია, ისეთ ადამიანს ახალგამოჩენილი სახით ვერ ჩაანაცვლებ. ჩვენ სამი წელი ვატარებდით სახალხო ზეიმებს და  ყველა მომღერალს ვაკავებდით.

– ასევე არსებობდა მოსაზრება, რომ მხოლოდ თქვენ გიკვეთავდათ სახელმწიფო კონცერტებს…

–  დიახ, ვიღაც-ვიღაცეებს ვამჩნევ, რომ  პრეტენზიები აქვთ,  მე რატომ ვატარებდი კონცერეტებს და არა  თვითონ. ყოველთვის ვცდილობდი, რომ ამაზე არ მელაპარაკა, არ ჩაეთვალათ, რომ თავში მქონდა ავარდნილი, ან ამბიციები მაწუხებდა. მე თუ ამბიციები მაწუხებს, დამერწმუნეთ, ის აბსოლუტურად ჯანსაღია და ყველაფერი ჩემი ისტორიიდან, შექმნილი თუ გაყიდული პროდუქციიდან გამომდინარეობს. თუ ვინმეს პრეტენზია აქვს,  მაშინ შეადარონ თავიანთ და ჩემს სპეციალობაში თუ გამოცდილებაში შემავალი კომპონენტები და აქედან გამომდინარე იმსჯელონ, თუ საახალწლო კონცერტების ჩატარების ამბიცია რატომ შეიძლებოდა მქონოდა?!

მექნება კიდევ და  აუცილებლად ჩავატარებ, როცა ჩემ კომპანიას, „არტ ფორუმს“, რომლიც სამი წელია დახურული და დაყადაღებულია, დავიბრუნებ. ახლა, სურვილიც რომ მქონდეს, ვერ მივიღებ ვერანაირ  კონკურსში მონაწილეობას. (შეგახსნებთ, რომ კომპანია „არტ ფორუმი“ 3 მილიონიანი დავალიანების მიზეზით დაყადაღდა. როგორც მომღერალი აცხადებს, მისთვის გაუგებარია, თუ რა 3 მილიონზეა საუბარი და აცხადებს, რომ მის კომპანიას დავალიანება არ აქვს. ავტ.)

– კომპანია „არტ ფორუმის“ სამართლებრივი პროცესები როგორ მიმდინარეობს?

– საქმე სააპელაციო სასამართლოს გადასცეს და ველოდებით შედეგებს. ჩვენი კომპანია აბსოლუტურად დამოუკიდებელი იყო. ნუ ექნება ვინმეს ილუზია, რომ ჩვენ მთავრობის გამო გავხდით პოპულარული. ვისაც უნდა ამ ინფორმაციის მოძიება, მარტივად ნახავს. სახელმწიფოსთვის პროექტის გაკეთება საამაყოა და ამას მიღწევა უნდა.

დიდი სურვილი მაქვს ჩვენ კომპანიას თავი დაანებონ, გაიხსნას და საქართველოში ჯანსაღი კონკურენცია გაჩნდეს. მაგრამ ეტყობა სწორედ ეს არის მიზეზი, რადგან ამ სფეროში ერთმანეთს ებრძვიან ადამიანები და ეტყობა ხელს უწყობენ მსგავს საკითხებს, როგორიცაა თუნდაც კომპანიის დახურვა.

– უფრო ზუსტად, რომ განმარტოთ, რა შენიშვნები გაქვთ ახალი წლის თბილისის ღონისძიების ორგანიზატორებთან?

– პრობლემა ის არის, რომ ადამიანები არ იღებენ თავიანთ თავზე პასუხისმგებლობას, არ გამოდიან და არ სცემენ პასუხს არტისტებს, საზოგადოებას. ვინც აიღო თავის თავზე სახალხო ზეიმის ორგანიზება, გამოვიდეს და ჩამოთვალოს, თქვას მანამდე რა გაუკეთებია, მისი სპეციალობა რა კომპონენტებს, რა გამოცილდებას მოიცავს, იმიტომ, რომ  მე, როგორც შემსრულებელი, ავტორ-შემსრულებელი, არტისტი, პროდიუსერი და ორგანიზატორი, ვამბობ, რომ  ყველა საფეხური გავიარე და სახელმწიფო პროექტების ჩატარებაზე პრეტენზია მას შემდეგ გამიჩნდა. თუ ადამიანები, როგორც პროდიუსერები, ორგანიზატორები და მუსიკოსები არშემდგარები არიან, იმიტომ, რომ მათი სახელისა და გვარის გაგებაზე კიხთულობენ, ვინ არის? ასეთი ადამიანების მიერ სახალხო ზეიმების ჩატარება არასწორი ფორმაა.

– მიუხედავად იმისა, რომ მის მიერ შეტანილი პროექტის კონცეფცია  შეიძლება მოეწონათ?

– დაზუსტებით არ ვიცნობ ამ კონცეფციას. ამიტომ დაწვრილებით ვერ ვილაპარაკებ, მაგრამ აქ ვიღაცის კონცეფციაზე არ არის საუბარი. ეს სახალხო პროექტია და ის საერთო და სახალხო მოთხოვნების გათვალისწინებით უნდა ტარდებოდეს. ისე არ არის, რომ მე რაც მომწონს და მინდა, ის ჩავატარო. ჩვენი ფორმა ასეთი იყო – ძველი შემსრულებლებიც, ახალი შემსრულებლებიც, არსებული შემსრულებლებიც და სხვადასხვა მუსიკალური მიმდინარეობებიც.

ის, რაც ახლა ჩვენ ქვეყანაში ხდება, უდიდესი პრობლემაა. ვგულისხმობ იმას, რომ არ არსებობს კლასიფიკაცია – ვის რა გაუკეთებია, რა გამოცდილება აქვს და ა.შ. არ შეიძლება არშემდგარი, არაფრისშემქმნელი ადამიანი ამგვარ პროექტებს ატარებდეს, ხოლო მათ გვერდით არსებობდნენ გამოცდილი ადამიანები, რომლებსაც განვითარებულ ქვეყანაში კონსულტაციისთვის მაინც ეძახიან.

მანა ნოდია

 

იტვირთბა....