მთავრობის უწყებათაშორისი საკოორდინაციო საბჭოს გადაწყვეტილებით, პირველი თებერვლიდან ქვეყანაში ზოგიერთი შეზღუდვა მოიხსნება, ხოლო ზოგი ძალაში დარჩება. მათი გადაწყვეტილებით ქვეყანაში პირველ მარტამდე იმოქმედებს ე.წ. კომენდანტი საათი, რომელიც კრძალავს გადაადგილებას საღამოს 21:00 საათიდან დილის 05:00 საათამდე და არ იმოძრავებს საზოგადოებრივი ტრანსპორტი.
ე.წ. წერტილოვანი შეზღუდვების მოხსნას იმუნოლოგ-ალერგოლოგი ბიძინა კულუმბეგოვი გამოეხმაურა და საკუთარი აზრი დააფიქსირა. მისი თქმით, თუ საზოგადოება რეკომენდაციებს გაითვალისწინებს, სახელმწიფოს სწრაფად მიეცემა საშუალება, რომ შემზღუდავი ღონისძიებები შეამსუბუქოს.
„ჩვენ როცა ვსაუბრობთ წერტილოვან დახურვაზე, ბევრი უნდა ვისაუბროთ წერტილოვან გახსნაზე. უნდა არსებობდეს უსაფრთხო ტრანსპორტის გახსნის გეგმა. ქალაქის მერია იქნება თუ ნებისმიერი სამსახური, უნდა დაჯდეს და შემოგვთავაზოს გეგმა – ჯერ ვთქვათ, ავტობუსი ამუშავდეს, მეტრო სულ ბოლოს ამუშავდეს. რისკები უნდა განაწილდეს, ყველა ავტობუსში უნდა იყოს სულ მცირე ერთი ადამიანი, რომელიც გააკონტროლებს ავტობუსის 30-35%-ით დატვირთვას.
ასე თუ არ მოვიქეცით, ვირუსი კიდევ დიდხანს დარჩება ჩვენთან ერთად. ამიტომ ეს ძალიან მნიშვნელოვანია. ჩვენ გაგვიჩნდა თავისუფალი ადგილები საავადმყოფოებში, ამიტომ, რაღაც ეტაპზე, შეიძლება, რომ პანდემია მიუშვა. ტრანსპორტის გავლენა შეიძლება იყოს 15%, ანუ გყავს 1 500 დაავდებული, შეიძლება გაგიხდეს 1 700, მაგრამ არ გაგიხდება 8 500. ამ ინფექციის 50% ის გადადება ხდება სახლში, სამსახურში, მეგობრების წრეში. ამიტომ ჩვენ უნდა ვაკონტროლოთ ჩვენი თავი, პირბადე, ჰიგიენა და სოციალური ქცევა უნდა შეცვალოთ და თუ ამას გავაკეთებთ, დანარჩენი ცხოვრების გამარტივება უფრო გაუადვილდება სახელმწიფოსაც და ჩვენც.
ამიტომ ყველას მოვუწოდებ, ჩვენს წილ პასუხისმგებლობაზე უფრო მეტი ვიფიქროთ. თუკი რეკომენდაციებს გავითვალისწინებთ, სახელმწიფოს სწრაფად მიეცემა საშუალება, შემზღუდავი ღონისძიებები გადაიხედოს და უფრო სწრაფად მოხდეს ყველაფრის ამუშავება“, – განაცხადა ბიძინა კულუმბეგოვმა.