სტრასბურგის სასამართლო “2008 წლის რუსეთ-საქართველოს ომის” საქმეზე გამოტანილ განაჩენთან დაკავშირებით პრესრელიზს ავრცელებს.
როგორც პრესრელიზში ვკიტხულობთ, სასამართლომ დაადგინა, რომ ქართველი ტყვეების მიმართ არასათანადო მოპყრობა აღქმულ უნდა იქნას როგორც წამების აქტი.
„საქართველო რუსეთის წინააღმდეგ“ გამოტანილ განაჩენთან დაკავშირებით გავრცელებულ პრესრელიზში აღნიშნულია, რომ სამხრეთ ოსური ძალების მხრიდან ქართველ ტყვეების მიმართ არასათანადო მოპყრობის ფაქტებზე პასუხისმგებლობა რუსულ ძალებსაც ეკისრებათ.
„სასამართლომ ჩათვალა, რომ მას ჰქონდა საკმარისი მტკიცებულებები იმისთვის, დაედგინა, რომ ომის ქართველი ტყვეები სამხრეთ ოსური ძალების მხრიდან ისეთი ტიპის მოპყრობის მსხვერპლნი გახდნენ, რომელიც ეწინააღმდეგება კონვენციის მესამე მუხლს. იმის მიუხედავად, რომ რუსული ძალების უშუალო მონაწილეობა ყველა შემთხვევაში აშკარად დემონსტრირებული არ ყოფილა, ის ფაქტი, რომ სამხედრო ტყვეები რუსეთის იურისდიქციაში შედიოდნენ გულისხმობდა, რომ ეს უკანასკნელი ასევე იყო პასუხისმგებელი სამხრეთ ოსეთის მოქმედებებზე. იმის მიუხედავად, რომ რუსული ძალები ადგილზე იყვნენ, მათ აღნიშნული ტიპის მოპყრობის წინააღმდეგ ზომები არ მიუღიათ.
სასამართლომ დაადგინა, რომ ქართველი ტყვეების მიმართ არასათანადო მოპყრობა, კონვენციის მესამე მუხლის განმარტების შესაბამისად, აღქმულ უნდა იქნას როგორც წამების აქტი. ასეთ ქმედებებს განსაკუთრებულ სერიოზულობას სძენს ის, რომ ისინი მიმართული იყო სამხედრო ტყვეების მიმართ, რომლებიც, საერთაშორისო ჰუმანიტარული სამართლის შესაბამისად, განსაკუთრებული დაცვის სტატუსით სარგებლობდნენ“, – აღნიშნულია პრეს რელიზში.
სტრასბურგის სასამართლომ 2008 წლის ომის საქმეზე გადაწყვეტილება ცოტა ხნის წინ გამოაცხადა. სასამართლომ დაადასტურა, რომ 2008 წლის 12 აგვისტოს შემდეგ, რუსეთს აქვს ეფექტური კონტროლი ტერიტორიაზე და შესაბამისად, ყველა დარღვევა რაც მოხდა მას შეერაცხება.