აშშ-ში მოღვაწე ექიმი-კარდიოლოგი ნანა გეგეჭკორი სოციალურ ქსელში იმ მოქალაქეებს მიმართავს, რომლებსაც კორონავირუსის მკურნალობაში პრეპარატ “რემდესივირზე” ხელი არ მიუწვდებათ.
როგორც ექიმი წერს, ვისაც ამ პრეპარატზე ხელიარ მიუწვდება, გული არ უნდა გაიტეხონ, რადგან ის ადამიანებს ვერ გადაარჩენს.
„ამ პრეპარატის გამოყენების გამოცდილება მაქვს მისი გამოჩენის პირველივე დღიდან. ჩემი ჰოსპიტალი იყო ნაწილი პირველივე კვლევისა, რომელიც რემდესევირზე დაიწყო. ვერც ერთმა, აქამდე გამოქვეყნებულმა კვლევამ, ვერ დაადასტურა მისი გავლენა სიკვდილიანობაზე. ჰოსპიტალიზირებულ პაციენტებში რემდესევირის გამოყენება არ ამცირებს სიკვდილიანობას. ის მხოლოდ ნაწილობრივ ამცირებს დაავადების სიმპტომატური დღეების რაოდენობას. ცხადია, როგორც ნებისმიერ პრეპარატს მასაც აქვს გვერდითი მოვლენები. მცირე ნაწილში შეუძლია გამოიწვიოს ღვიძლის მწვავე უკმარისობა. ჯერჯერობით, ზუსტად არ ვიცით, რა დოზაა იდეალური თირკმლის მსუბუქი უკმარისობისას. ზოგადად ნაკლებად ტოქსიკური პრეპარატია, თუმცა კოვიდის მკურნალობაში მისი წვლილი ნადვილად არაა ფასის შესაბამისი.
ამერიკულ ჯანდაცვას აქვს ფუფუნება, თუნდაც ძალიან ძვირადღირებული პრეპარატით შეუმსუბუქოს სიმპტომები ჰოსპიტალში მოხვედრილ ნებისმიერ პაციენტს. ნებისმიერ პაციენტს… რაც თანაბრად გულისხმობს არალეგალ, ღარიბ უცხოელსაც და ამერიკის მდიდარ მოქალაქესაც… საქართველოში ამ პრეპარატზე დახარჯული თანხა არამიზნობრივი ხარჯია, რადგან იგივე ფასად, ქვეყანას შეუძლია კოვიდთან ბრძოლაში ბევრად უფრო ეფექტური არაინვაზიური ვენტილაციისთვის საჭირო მოწყობილობების შეძენა საკმარისი რაოდენობით. ვისაც რემდესევირზე ხელი არ მიგიწვდებათ გული არ დაგწყდეთ. ის ვერ გადაარჩენს თქვენს საყვარელ ადამიანებს. გადარჩენაა მთავარი, თორემ სიმპტომებს ავიტანთ როგორმე…” წერს ექიმი ნანა გეგეჭკორი.
შეგახსენებთ, პრეპარატ “რემდესივირზე” თემა მას შემდეგ უფრო გააქტიურდა, როცა ინფექციური საავადმყოფოს დირექტორმა თენგიზ ცერცვაძემ მკურნალობის დროს მიიღო.
ცნობისთვის, გამოჯანმრთელების შედმეგ, თენგიზ ცერცვაძემ პირველი განცხადება გაავრცელა, სადაც ამბობს, რომ მან მდგომარეობის დამძიმების შემდეგ პრეპარატი “რემდესივირი” გადაისხა. ხოლო, ვინაიდან ეს პრეპარატი ჯერ საქართველოში არ შემოსულა, მას უცხოეთიდან გამოუგზავნეს. ამ განცხადებას მისი მისამართით დიდი კრიტიკა მოჰყვა.