პარტია “გამარჯვებული საქართველოს” ლიდერი ირაკლი ოქრუაშვილი კორონავირუსით დაინფიცირდა. ამის შესახებ თავად ოქრუაშვილმა “ფეისბუკგვერდზე” დაწერა.
როგორც ოქრუაშვილი აცხადებს, კოვიდდიაგნოზის გამო ის 8 ნოემბრის აქციას ვერ შეუერთდება.
აღსანიშნავია, რომ ოქრუაშვილს კორონავირუსზე დადებით პასუხი მის დაბადების დღეზე მიუვიდა.
“საინტერესო 47-ე წელი შევასრულე (ცესკოს დათვლით 57-ე). საერთოდ არ მიყვარს საკუთარი დაბადების დღე, არც მისი აღნიშვნა და არც მასზე საუბარი. სხვა მიზნით ვწერ პოსტს.
სად აღარ “აღმინიშნავს” დაბადების დღე, მიტინგზე, აეროპორტში, ტყეში, ციხეში და ა.შ. ცხოვრება ყოველთვის საინტერესო საჩუქრით მაჯილდოვებდა.
წელს, ვფიქრობდი რა საჩუქარს მომიმზადებს იღბალი-მეთქი და მივიღე განსაკუთრებული – ლაბორატორიის დადებითი პასუხი კორონაზე.
ამის გამო არ ვჩანდი ბოლო ორი დღე აქციებზეც და ტელევიზიებშიც, რადგან პასუხს ველოდი და სამწუხაროდ 8 ნოემბერსაც მომიწევს აქციის გამოტოვება. გადამდები, რომ არ ვიყო აუცილებლად მოვიდოდი. თუმცა 8-ში მხოლოდ “იწყება” და აუცილებლად დაგეწევით რამდენიმე დღეში.
უჩემოდ ბარიკადები არ იქნება…
მადლობა ყველას, მოლოცვაზე მეტად 8 ნოემბერს რუსთაველზე მისვლისთვის,”- წერს ირაკლი ოქრუაშვილი.