ირაკლი კვარაცხელია, რომელიც ერთ-ერთია 19 მძევალს შორის, აცხადებს, რომ გამტაცებელი კბილებამდეა შეიარაღებული, აქვს გახსნილი ყუმბარა და ითხოვს ნახევარ მილიონ დოლარს. მისივე თქმით, სამართალდამცველების მხრიდან იყო გამტაცებელთან კომუნიკაცია და მოლაპარაკების მცდელობა, თუმცა შენობაში ამ დრომდე არავინ შესულა.
“პირველ რიგში ითხოვს, რომ სპეცრაზმი მოაცილონ პერიმეტრს. პოლიციელს თავად არ ეკონტაქტება, პოლიციას ეკონტაქტება მძევლების საშუალებით, ანუ ჩემი და კიდევ სხვა მძევლების საშუალებთ. ისამბობს, რომ გადავრჩებით, თუ მოთხოვნები შესრულდება, ასეთ შემთხვევაში ჩვენი უსაფრთხოების გარანტიებს იძლევა. ამისთვის იძლევა 2 საათს. ჩვენთან ერთად არ არიან ბავშვები, მაგრამ არიან ქალები.
შენობაში ვიმყოფებით 19 ადამიანი, ერთ ოთახში ვართ, ჩვენს გვერდით არის გამტაცებელი კბილებამდე შეიარაღებული, ავტომატით, პისტოლეტით, ყუმბარით, რომელსაც მოხსნილი აქვს დამცველი და ხელში უჭირავს მუდმივად, ამიტომ ამ სიტუაციის ყველანაირი ძალადობრივი მოგვარეობა გამორიცხულია, რადგან ეს გამოიწვევს მძევლების მსხვერპლს.
გამტაცებელი ითხოვს 500 000 დოლარს და იმას, რომ აუცილებლად, რაც შეიძლება სწრაფად შემოვიდეს ვინმე, შეუიარაღებელი, ვისაც აქვს მოლაპარაკების ლეგიტიმაცია. თავდამსხმელი ერთია და ჩემს გვერდითაა ახლა.
მხოლოდ დაპირდნენ მას, რომ შემოვიდოდნენ, მაგრამ ერთი საათია აქ ვართ და არავინ შემოსულა, უცნობია როდის შემოვა ვინმე” – განაცხადა მძევალმა.
შეგახსენებთ, ზუგდიდის ცენტრში, გამსახურდიას ქუჩაზე მდებარე „საქართველოს ბანკში“ პირი შეიჭრა და მძევლები აიყვანა.