“თუ ქვეყანაში რაიმე ხდება, პოლიტიკური ძალები და ტელევიზიები ყველაფერს არჩევნებს უკავშირებენ” – მეუფე იაკობი დავით გარეჯის საკითხზე

ბოდბელი ეპისკოპოსის, მეუფე იაკობის განცხადებით, თუ ქვეყანაში რაიმე ხდება, პოლიტიკური ძალები და ტელევიზიები ყველაფერს არჩევნებს უკავშირებენ. – ამის შესახებ მეუფემ დავით გარეჯის საკითხთან დაკავშირებით ჟურნალისტებთან განაცხადა.

როგორც მეუფე იაკობმა საკვირაო წირვის დასრულების შემდეგ განაცხადა, სასიხარულოა, რომ იპოვეს რუკა, რომლითაც უნდა იხელმძღვანელონ, თუმცა, ეს იმას არ ნიშნავს, რომ ეკლესია ვინმეს მხარეს დაიჭერს.

“როცა პროფესიონალი ხარ და რაღაც თანამდებობაზე ხარ, ყოველთვის უნდა შეგეძლოს იმის განსაზღვრა, რას რა მოჰყვება. როცა შენ ცალსახად ამბობ, იმ რუკას იყენებ, რომელიც იმ მიწას სადავოს ხდის და საზღვარი აქეთ გამოდის, ჩემი ბრალია? ნახეს რუკა, ჩამოიტანეს, სულ არ მაინტერესებს, საიდან ჩამოიტანეს, მთავარია რუკა იყოს სწორი, ყველა მხარემ მიიღოს, მაგრამ სხვა რამის ეშინიათ ეტყობა – ზუსტად ისე არ გავიდეს საზღვარი, როგორც ახალ რუკაზე, ეშინიათ და არ უნდათ, რომ რომელიღაც ხელისუფლებამ გააკეთოს. ახალი პარლამენტი იქნება და თუნდაც, რუკა გქონდეს, ამას უნდა მოლაპარაკებები, 24 წელი გრძელდებოდა ხომ? უბრალოდ, სასიხარულოა, რომ წესიერი რუკა ვნახეთ, რომელიც უნდა გვქონოდა. ამ დროს ატეხილი ამბავი… ხან მამაოს გადასწვდებიან და ნეტავ, რომელიმე მათგანი იყოს მამაოსავით წესიერი, პატიოსანი და საქართველოსთვის თავდადებული. მამაოს გამო არავინ არის დაჭერილი, ყველა თავის საქციელზე აგებს პასუხს, თუ პროკურატურა, ხელისუფლება არ არის საჭირო, უდანაშაულობის პრეზუმფცია არ უნდა დავარღვიოთ, მოღალატეები არ უნდა ვეძახოთ, გამოჩნდება მალე, შეგნებულად კეთდებოდა რაღაც თუ რის გამო კეთდებოდა?, – აღნიშნა მეუფემ.