“ნაციონალური მოძრაობის” წევრი, სალომე სამადაშვილი თეა წულუკიანის გადაწყვეტილებას ეხმაურება, რომლის თანახმადაც, თუ ქორწინებიდან 1 წელი არ არის გასული, ქალი ინ ვიტრო(ხელოვნურ) განაყოფიერებას ვერ შეძლებს.
როგორც სამადაშვილი წერს, იტალიისგან განსხვავებით, აშშ-ში ვისაც სურს მშობელი გახდეს, სახელმწიფო ხელს არ უშლის.
“მახსოვს, გამიკვირდა, როდესაც ძალიან წარმატებულმა ქალმა, ჩემმა იტალიელმა მეგობარმა, გულდაწყვეტით მითხრა, შანსი არ ჰქონდა დედა გამხდარიყო, თუ იტალიის მოქალაქედ დარჩებოდა. მისი ქვეყანა კრძალავს ქორწინების გარეშე შვილად აყვანას და ცხადია, შესაბამის სამედიცინო ჩარევასაც. ვიფიქრე, რაღაცაში მაინც წინ ვართ, ზოგიერთ ევროპულ ქვეყნასთან შედარებით. ახლა, ამ ‘შეცდომის’ გასწორებაც სურთ…ამერიკაში ჩემი ერთ-ერთი პროფესორი, წარმატებული, სტამბულელი წარმომავლობის ქალი იყო, რომელსაც ასევე სურდა დედობა, მიუხედავად იმისა, რომ არ დაქორწინებულა. იტალიისგან განსხვავებით, აშშ-ში ვისაც სურს მშობელი გახდეს, სახელმწიფო ხელს არ უშლის. სადღაც, თურქეთის შორეულ პროვინციაში, გემზე მიგდებული პატარა ბიჭი იშვილა, რომელიც დღეს ჰარვარდის სტუდენტია. არ ვიცი, ღმერთს უფრო გაეხარდებოდა, სადმე შიმშილით მომკვდარიყო?”, – წერს სამადაშვილი.
ცნობისთვის, იუსტიციის მინისტრმა 25 აგვისტოს მოაწერა ბრძანებას ხელი. სამოქალაქო აქტების რეგისტრაციის წესში ცვლილებები 2020 წლის 1-ლი სექტემბრიდან ამოქმედდება. ცვლილებების თანახმად, განაყოფიერებამდე ნოტარიულად დადებული ხელშეკრულების მხარე შეიძლება იყოს “ქალისა და მამაკაცისგან შემდგარი წყვილი, რომლის მიზანსაც წარმოადგენს ექსტრაკორპორული გზით დაბადებული ბავშვის აღზრდა” იმ შემთხვევაში, თუ ისინი: იმყოფებიამ ქორწინებაში და ქორწინებიდან გასულია სულ მცირე, 1 წელი; იმყოფებიან ფაქტობრივ თანაცხოვრებაში, სულ მცირე, უკანასკნელი 1 წლის განმავლობაში. ქალისა და მამაკაცის ფაქტობრივ თანაცხოვრებაში ყოფნის ფაქტი ნოტარიუსის წინაშე უნდა დადასტურდეს შესაბამისი დოკუმენტებით.