15 აგვისტოს გაუჩინარებულ ორ ახალგაზრდას მესამე დღეა ეძებენ.
ამ დრომდე არანაირ ინფორმაციას არ ფლობს არც ოჯახის წევრები და არც თანამშრომლები.
“ჩვენი თანამშრომლები არიან. გუშინ ღამე 5-ზე წავიდნენ “ბაუჰაუსიდან” და ამ დრომდე არ ჩანან და ვეძებთ ჩვენც და პოლიციაც. არ გამოჩნდნენ. ვეძებთ ოჯახები და პოლიცია. მკვდრები ვართ უკვე. აღარ შეგვიძლია. ორი წუთით გავიდნენ ბარიდან ჩანთების გარეშე და არსად ჩანან”, – აცხადებენ ახლობლები.
შეგახსენებთ, რომ 15 აგვისტოს დილის 5:00 საათზე, ორი ახალგაზრდა, გიორგი შალამბერიძე და ბაია ბერუაშვილი, ხელჩანთებისა და სხვა პირადი ნივთების გარეშე სამუშაო ადგილიდან გავიდნენ. მათი კვალი დედაენის ბაღის გავლით იუსტიციის სახლთან იკარგება. შინაგან საქმეთა სამინისტროში კი შეტყობინება საღამოს 9:00 საათზე შევიდა.
ფაქტთან დაკავშირებით გამოძიება თავისუფლების უკანონოდ აღკვეთის მუხლით მიმდინარეობს.