“ეს განცხადება არ მიკვირს რუსეთის ხელისუფლებისგან, რომელიც ცდილობს, რომ საქართველოს დააბრალოს და თვითონ გამართლდეს, მაგრამ ვისურვებდი, რომ საქართველოს ხელისუფლება არ მონაწილეობდეს იმ პროცესში, როდესაც ხდება საქართველოს მხარეზე ბრალის გადმოტანა”, – ამის შესახებ „ევროპული საქართველოს“ ლიდერმა, დავით ბაქრაძემ განაცხადა, რითაც დიმიტრი მედვედევის განცხადებას გამოეხმაურა.
როგორც ბაქრაძე აღნიშნავს, „ქართული ოცნება“ მზად არის, რომ რუსეთს პასუხისმგებლობა მოუხსნას და საერთაშორისო პარტნიორების წინაშე თავის მართლება გაუმარტივოს.
„ასეთი განცხადება მედვედევისგან სრულიად ბუნებრივია, ის არის ადამიანი, რომელმაც უშუალოდ გასცა ბრძანება საქართველოს წაინააღმდეგ აგრესიის შესახებ. ის არის ადამიანი, ვის ხელებზეც არის ომის დროს დაღვრილი სისხლი და ათიათასობით დევნილი საქართველოში. ის არის ადამიანი, რომელიც იმალებოდა პუტინის ზურგს უკან და რა თქმა უნდა, ჩვენ გვესმის, რომ გადაწყვეტილების მიმღები იყო რეალურად პუტინი, მაგრამ მედვედევი არის პრეზიდენტი, რომელმაც გასცა ბრძანება ძალის გამოყენების შესახებ. ამიტომ მისი მხრიდან ასეთი ტიპის განცხადებები არის სრულიად ბუნებრივი, ეს ემსახურება თავის მართლებას საკუთარი თავის გადარჩენას და რუსეთის იმ იმპერიული პოლიტიკის გამართლებას, რომელმაც მოიტანა უამრავი უბედურება საქართველოშიც და ძალიან ბევრ სხვა ქვეყანაშიც.
მედვედევის მხრიდან ასეთი განცხადებები ნამდვილად არ მიკვირს, მაგრამ ძალიან საზიანოა ქვეყნისთვის, როდესაც საქართველოს შიგნით, ბრალის გადმოტანა მაშინდელ ხელისუფლებაზე ხდება. აგრესიაზე პასუხისმგებელი მთლიანად არის რუსეთი, პასუხისმგებლობის ტვირთი და სიმძიმე მთლიანად რუსეთის მხარესაა და ამიტომ, ნებისმიერი განცხადება, რომელიც ამ ტვირთს მოაცილებს რუსეთს და გადმოიტანს ქართულ მხარეს, ეწინააღმდეგება საქართველოს ინტერესებს. ამიტომ, ვწუხვარ, რომ „ქართული ოცნება“ საკუთარი პარტიული ინტერესებიდან გამომდინარე, მზად არის, ოპონენტების დასაზიანებლად წავიდეს იმაზეც, რომ ტვირთი და პასუხისმგებლობა მოუხსნას რუსეთს, გაუმარტივოს თავის მართლება საერთაშორისო პარტნიორების წინაშე და ბრალის ნაწილი გადმოიტანოს ქართულ მხარეს. ქართული მხარის ბრალი არაფერშია. ჩვენ ვართ ჩვენს სახელმწიფოში, ჩვენს ტერიტორიაზე, პასუხისმგებელი აგრესიაზე მთლიანად არის რუსეთი“, – დავით განაცხადა ბაქრაძემ.
ცნობისთვის, რუსეთის უსაფრთხოების საბჭოს თავმჯდომარის მოადგილე, დიმიტრი მედვედევი 2008 წლის აგვისტოს ომს სოციალურ ქსელში გამოეხმაურა. მედვედევის თქმით, ოფიციალურმა მოსკოვმა “ნაძირლების ქმედებებს უპასუხა”.