სასჯელაღსრულების დეპარტამენის ყოფილი უფროსი, ძებნილი დავით ჭაკუა გერმანიამ საქართველოს გადმოსცა. ამის შესახებ ინფორმაცია “პირველ არხს” გენერალურ პროკურატურასა და იუსტიციის სამინისტროში უდასტურებენ. ჭაკუას ექსტრადირება საქართველოში სავარაუდოდ დღეს განხორციელდება.
აქვე გეტყვით, რომ დავით ჭაკუა არაერთი სისხლის სამართლის საქმეშია ბრალდებული. ის ძებნილად 2013 წელს გამოცხადდა. ჭაკუას სხვა ყოფილ მაღალჩინოსნებთან, მათ შორის ბაჩო ახალაიასთან, რევაზ ჭარბაძესთან და და მეგის ქარდავასთან ერთად, ბრალად ედება 2006 წლის 27 მარტს, თბილისში ციხის ბუნტის პროვოცირება, რა დროსაც შვიდი პატიმარი გარდაიცვალა.
ამ საქმეზე დავით ჭაკუას მიმართ პირველი ინსტანციის სასამართლომ გამამტყუნებელი განაჩენი გამოიტანა და წამების ბრალი დაუმტკიცდა, საბოლოო სასჯელად კი, სამი წლითა და ცხრა თვით პატიმრობა აქვს შეფარდებული.
დავით ჭაკუა ბრალდებულია იუსტიციის ყოფილ მინისტრ ზურაბ ადეიშვილთან ერთად, პატიმრების წამების საქმეზე, სადაც სამსახურებრივი უფლებამოსილების ბოროტად გამოყენებას, მოწმეებზე ძალადობა და მტკიცებულებების ფალსიფიკაციას ედავებიან. კერძოდ, გენერალური პროკურატურის ინფორმაციით, დავით ჭაკუა ფიგურირებს 2012 წელს პატიმრების წამების საქმეში, რის შემდეგაც ციხის კადრები გავრცელდა.