ძალიან დიდი ძალისხმევა იყო ჩადებული ხელისუფლების მხრიდან, რათა ამერიკის შეერთებული შტატების კონგრესს მიეღო რეზოლუცია, რომ ნებისმიერი, ვინც სცნობს აფხაზეთს ან ცხინვალის რეგიონს, იქნება ამერიკის შეერთებული შტატების ეკონომიკური სანქციების ქვეშ.– ეს განცხადება საქართველოს პარლამენტის თავმჯდომარის მოადგილემ, საპარლამენტო უმრავლესობის ლიდერმა, გიორგი ვოლსკიმ ტელეკომპანია „იმედის“ ეთერში გააკეთა.
„მეორე შეკითხვა, რაც ალბათ ყველაზე ხმამაღლა უნდა დაისვას, არის ის, თუ რატომ არ ამბობდნენ, რომ 8 აგვისტომდე რუსეთი მონაწილეობს, რაში იყო საქმე. ეგ რომ თქვან, მაშინ გამოდის, რომ თქვენ, ნებისმიერმა ჟურნალისტმა ან „ნაციონალური მოძრაობის“ მხარდამჭერმა ჩვეულებრივმა მოქალაქემ შეიძლება, იკითხოს, რომ თუ ადრე იცოდით, რომ ის ჩართულია და ამას აღიარებთ, მაშინ ეს ხალხი რატომ არ გამოიყვანეთ? კიდევ ერთი შეკითხვაა მთავარი. უშიშროების საბჭოს რატომ არ მიმართეს, რომელსაც ასევე პასუხი არ აქვს. მე როდესაც ამას ვამბობ ან რომელიმე ჩემი კოლეგა, პასუხი ის არის, რომ თქვენ რუსეთის ინტერესების პოზიციიდან ლაპარაკობთ, როცა სწორედაც რომ პირიქით არის. ადამიანებმა თავის თავს არ უნდა უწოდონ ანტისაოკუპაციო ძალა და თავის ოპონენტებს რუსეთის ხელისშემწყობი, როდესაც ვითარება აბსოლუტურად სხვაგვარად გამოიყურებოდა“, – განაცხადა გიორგი ვოლსკიმ.
ინფორმაციას საქართველოს პარლამენტის პრესსამსახური ავრცელებს.