საქართველოს ეკონომიკის ყოფილი მინისტრი გიორგი ქობულია აცხადებს, რომ დღეს პარლამენტის დეპუტატთა ნაწილთან შეხვედრაზე იქნება საქმიანი საუბარი ეკონომიკის განვითარებაზე.
„შეხვედრის ფორმატი არის შემდეგი – მე მომმართა ოფიციალური წერილით ექვსმა დეპუტატმა, მინდა აღვნიშნო, რომ ეს არის მხოლოდ „ქართული ოცნებისა“ და დამოუკიდებელი დეპუტატები. მათ მომმართეს წარმედგინა ანგარიში, რომელიც სამინისტრომ გაწია ჩემი მინისტრობის დროს. ჩავთვალე თავი ვალდებულად, რომ ასეთი ანგარიში წარმედგინა და ასეთი შეხვედრის ფორმატი შედგა, რომელსაც ჩვენ ვესწრებით. ძირითადი მიზანი ჩვენი შეხვედრის არის ღრმა ტექნიკური განხილვა, რაშიც გამოხატეს ინტერესი დეპუტატებმა, რომ მათ გაიგონ ჩემი ხედვა, გარდა იმისა, რომ გაიგონ, რა იყო გაკეთებული ამ რვა თვის განმავლობაში, გაიგონ აგრეთვე ჩემი ხედვა ეკონომიკის განვითარებაზე. აქ იქნება ღრმა საქმიანი საუბარი და ჩვენ მაქსიმალურად მოვარიდებთ თავს პოპულისტურ განცხადებებს და ვისაუბრებთ საქმეზე“, – განაცხადა ქობულიამ.
რატომ არ აპირებენ შეხვედრაზე დასწრებას საპარლამენტო უმრავლესობის დეპუტატები, გიორგი ქობულიამ აღნიშნა, რომ შეიძლება ვიღაცას ჰქონდეს ინტერესი, შეიძლება ვიღაცას არ ჰქონდეს და ეს მან არ ვიცი.
ყოფილმა მინისტრმა თანამდებობიდან მის გადაყენებაზეც ისაუბრა და აღნიშნა, რომ თანამდებობა თავისი ნებით არ დაუტოვებია.
„მე ვიყავი გადაყენებული, ჩემი გადაყენების პრეროგარტივა აქვს პრემიერ-მინისტრს და მან დაწერა განცხადება. ამაში გასაკვირი არაფერი არ არის, რომ ეს გადაწყვეტილება მმართველი პარტიის ლიდერთან კონსულტაციის შემდეგ იყო მიღებული“, – განაცხადა ქობულიამ.
შეგახსენებთ, რომ დღეს საქართველოს პარლამენტში ეკონომიკისა და მდგრადი განვითარების ყოფილ მინისტრს, გიორგი ქობულიას უსმენენ.