მთაწმინდის რაიონის გამგეობამ მრავალშვილიან დედებს შორის ავტორბოლის ჩასატარებლად გამოცხადებული ტენდერი შეწყვიტა.
მთაწმინდის გამგებლის მოადგილემ მიხეილ გოგოლაძემ განმარტა, რომ მონაწილეობა სხვა ქალბატონებსაც სურდათ.
“ტენდერის დასრულების ეტაპზე მოიმატა გამგეობაში შემოსულმა შეტყობინებებმა, სადაც ღონისძიებაში მონაწილეობის სურვილი გამოთქვეს რაიონის ტერიტორიაზე მცხოვრებმა სხვა ქალბატონებმაც, რომლებიც არ არიან მრავალშვილიანები.
დოკუმენტაციაში ამ ეტაპზე შეუძლებელია ცვლილებების შეტანა, ხოლო ტენდერის ფარგლებში არ ხერხდება მსურველთა უმრავლესობის მოთხოვნის იმ ხარისხით დაკმაყოფილება, რომელიც მისაღები იქნებოდა შესყიდვის მიზნებიდან გამომდინარე” – უთხრა გოგოლაძემ კომისიის წევრებს.
სხდომაზე მიიღეს გადაწყვეტილება, ტენდერი შეწყეს. მთაწმინდის გამგებლის თქმით, მომზადდება კორექტირებული სატენდერო დოკუმენტაცია, “რომელშიც გათვალისწინებული იქნება ყველა ის გარემოება, რომელიც წარმოიშვა ტენდერის გამოცხადების შემდეგ” – განაცხადა გოგოლაძემ.
შეგახსენებთ, რომ მრავალშვილიან დედებს შორის ერთდღიანი ავტორბოლა დედის დღესთან დაკავშირებით, არაუგვიანეს 8 მარტს უნდა ჩატარებულიყო. ამისთვის მთაწმინდის რაიონის გამგეობა 14 000 ლარის დახარჯვას აპირებდა.