ატენში, 87-ე უბანზე დამკვირვებლებს არ ეძლევათ საშუალება დააკვირდნენ საარჩევნო პროცესს, – ეს ინფორმაცია რადიო “მოზაიკას” “გაერთიანებული ოპოზიციის” წარმომადგენელმა, გია ქრისტესიაშვილმა მიაწოდა. ამის მაგალითად ის ატენის 87-ე საარჩევნო უბანს ასახელებს, სადაც მისი თქმით, შეკამათებაც მოხდა. ინფორმაციას რადიო “მოზაიკა” ავრცელებს.
“ჩვენ დამკვირვებლებს არ ეძლევათ საშუალება ნორმალურად დააკვირდნენ საარჩევნო პროცესს. კომისიის წევრების მაგიდები კედელთან ახლოს აქვთ მიდგმული და ფაქტიურად შეუძლებელია გავლა, რომ გაკონტროლდეს ამომრჩეველი, რა პროცედურებს გადის მაგიდებთან. მაგალითად, აწერს თუ არა ხელს თავისი სახელისა და გვარის გრაფაში ამომრჩევლი, აქვს თუ არა ხმის მისაცემად მისულ პიროვნებას თავისი პირადობის მოწმობა და ა.შ. სწორედ ასეთ ვითარებაში, რაც აქ ხდება მარტივადაა კარუსელის დატრიალება შესაძლებელი, რადგან წინა მხრიდან ვერ მიუდგებიან ჩვენი დამკვირვებლები, ბრალს დასდებენ პროცესის მიმდინარეობის ხელის შეშლაში და უბანს დაატოვებინებენ. ჩვენი მითითების მიუხედავად, მაგიდები ამ დრომდე კედელთანაა მიდგმული და გადაადგილება უკანა მხრიდან შეუძლებელია”, – აცხადებს გია ქრისტესიაშვილი.
ავტორი: ნოდარ სხირტლაძე