“თიბისი ბანკი” “მეტრონომს”: “საჭიროდ არ ვთლით დამატებითი კომენტარი გავაკეთოთ”

“თიბისი” ბანკი „ომეგა ჯგუფის“ დამფუძნებლის ზაზა ოქუაშვილის განცხადებებს სიცრუეს უწოდებს.   ბანკმა ამის შესახებ განცხადებაც გაავრცელა.

“მეტრონომი” დამატებითი დეტალების გასარკვევად დაუკავშირდა “თიბისი” ბანკს, თუმცა მათ განგვიცხადეს, რომ საჭიროდ არ თვლიან დამატებითი კომენტარი გააკეთონ ოქუაშვილის განცხადებებეთან დაკავშირებით.

ბანკი ოფიციალურ განცხადებაში აღნიშნავს, რომ ოქუაშვილის მონათხრობი არ შეესაბამება სიმართლეს და არის მცდარი ინფორმაციის გავრცელების მცდელობა.

„თიბისი ბანკისთვის“ უმთავრესი მნიშვნელობის არის კლიენტების ნდობა და ყველა აუცილებელი წესისა და პროცედურის დაცვა, რომელიც კლიენტის ფულის უსაფრთხოებასთან არის დაკავშირებული.

ბანკი უმაღლესი სიმკაცრით იცავს კომერციული ბანკებისთვის დადგენილ ყველა მოთხოვნას.

ბატონი ოქუაშვილის განცხადებასთან დაკავშირებით, „თიბისი ბანკი“ განმარტავს, რომ ბანკში ყველა ტრანზაქცია სრულდება სამუშაო საათებში, კლიენტის ანგარიშების გახსნისა და წარმოების ყველა წესის დაცვით. „თიბისი ბანკს“ გააჩნია კანონიერი ვალდებულება, დაიცვას კლიენტის პერსონალური მონაცემები და საბანკო საიდუმლოება, ამიტომ ბანკის მხრიდან დაუშვებელია კონკრეტული ტრანზაქციისა და კლიენტის შესახებ დეტალების გასაჯაროვება.

„თიბისი ბანკი“ მიმართავს ყველა სამართლებრივ ზომას აღნიშნული ცრუ ინფორმაციის მასშტაბირების საპასუხოდ“, – ნათქვამია განცხადებაში.

შეგახსენებთ, „ომეგა ჯგუფის“ დამფუძნებელმა ზაზა ოქუაშვილმა „რუსთავი 2“-ის ეთერში განაცხადა, რომ „თიბისი ბანკმა” „გახარიას ზეწოლით, დარღვევებით გასცა “ომეგას” დირექტორებზე 4 მილიონი და ეს თანხა ბანკთანვე მათ შეიარაღებულმა პირებმა ჩამოართვეს“.