პატრიარქი ფიქრობს, რომ დეკანოზი გიორგი მამალაძე დამნაშავეა,- ამის შესახებ
მეუფე იაკობმა ჟურნალისტებთან საუბრისას განაცხადა, პატრიარქი ფიქრობს რომ დეკანოზი გიორგი მამალაძე დამნაშავეა.
ჟურნალისტები მეუფისგან დაინტერესდნენ, თუ როდის შეიკრიბება წმინდა სინოდი და მოხდება თუ არა სინოდის მომავალ სხდომაზე დეკანოზ მამალაძის საკითხის განხილვა.
მეუფე იაკობის თქმით, სინოდის სხდომა შემოდგომაზე გაიმართება და ერთ-ერთი განსახილველი საკითხი დეკანოზ გიორგი მამალაძის თემა იქნება. მისივე თქმით, დეკანოზ მამალაძეს დეკანოზის სტატუსი უნდა ჩამოერთვას.
„ჩვენ შემოდგომაზე შევიკრიბებით. ერთ-ერთი საკითხი იქნება გიორგი მამალაძის თემა. ეკლესიას მისი უდანაშაულობის რომ გვჯეროდეს, ჩვენ აქამდე გამოვიყვანდით მას. მოგახსენებთ იმასაც, რომ პატრიარქი ფიქრობს, რომ გიორგი მამალაძე დამნაშავეა,“ – განაცხადა მეუფე იაკობმა.
კითხვაზე, აპირებს თუ არა მსჯავრდებული დეკანოზის მონახულებას ციხეში, მეუფე იაკობმა აღნიშნა, რომ არ აპირებს.
„ვინც მას ვიცნობთ და ვიცით, რას აკეთებდა, გიორგი მამალაძესთან არ შევალთ. მეუფე გრიგოლს აქვს თავისი აზრი, თუმცა მანაც ჩემთან საუბარში თქვა, რომ გიორგი მამალაძე დამნაშავეა,“ – განაცხადა მეუფე იაკობმა.
ჟურნალისტები ასევე დაინტერესდნენ დეკანოზ გიორგი მამალაძის მიერ მეუფე იაკობის მისამართით გამოთქმული ბრალდებებით და შეფასება სთხოვეს მის განცხადებაზე, რომლის მიხედვითაც, მამალაძის წინააღმდეგ ბრალი სწორედ მეუფე იაკობისა და შორენა თეთრუაშვილის ინტერესების გატარებას უკავშირდება.
„ადამიანი როდესაც მატყუარაა, ყოველთვის მატყუარად დარჩება. ამაზე ყოველთვის ჭორიკნები საუბრობდნენ. ამასთან, მინდა გითხრათ, რომ თუ არ მოისვენებენ, ვინც მას იცავს, ისინიც გაეხვევიან შარში,“ – აღნიშნა მეუფე იაკობმა.
მეუფე იაკობს არ დაუკონკრეტებია, ვის გულისხმობდა ამ განცხადებაში და აღნიშნა, რომ ეს მისი პირადი პოზიცია და განცხადებაა.