ვაკის პარკში მისულ ნინო ლომჯარიას აქციის მონაწილეებმა აგინეს. მათი გაღიზიანების მიზეზი უცნობია. ომბუდსმენის ადგილზე გამოჩენისთანავე, აქციაზე მყოფმა პირებმა მისი მისამართით შეურაცხმყოფელი შეძახილები დაიწყეს. მალევე ტერიტორიაზე მყოფმა ზაზა სარალიძემ ნინო ლომჯარიასთან ერთად ვაკის პარკი დატოვა.
ზაზა სარალიძემ განაცხადა, რომ ის მიდის სახლში.
“აქ დგას ჩემი შვილი და მე ჩემი შვილის გვერდზე ვიდგები. ვინც ვერ ხვდებით აქ მე რატომ ვარ, ზედმეტ კითხვებს ნუ დამისვამთ, მაღიზიანებს!,”-განაცხადა ზაზა სარალიძემ ვაკის პარკის დატოვებამდე.
ვაკის პარკში აქციას საზოგაოდების ერთი ნაწილი მართავს. ისინი ამბობენ, რომ ემიჯნებიან პოლიტიკას და სწორედ ამ მიზნით არ მივიდნენ რუსთაველის გამზირზე.
სამი დღის წინ, ღამით, აქციაზე მისულ პრემიერ გიორგი კვირიკაშვილს სიტყვის თქმა არ აცალეს, ბოთლები ესროლეს და ის იძულებული გახდა დაეტოვებინა საპროტესტო აქცია. მანამდე ის ზაზა სარალიძესთან მივიდა, მიუსამძიმრა და გადაეხვია.
მოგვიანებით, მან კანცელარიაში ბრიფინგი გამართა და განაცხადა, რომ ვერ ხედავს გადადგომის მიზეზს. მან საქმის გამოძიება, რომლის გამოც დაიწყო არეულობა, შსს-ს გადასცა. კვირიკაშვილის თქმით, შს მინისტრ გახარიასთან ერთად ის პირადად მიადევნებს თვალს გამოძიებას.
მანამდე, საქართველოს მთავარი პროკურორი ირაკლი შოთაძე გადადგა. მან ეს გადაწყვეტილება ხორავას ქუჩის საქმეზე მოსამართლის გადაწყვეტილების შემდეგ მიიღო.
თბილისის საქალაქო სასამართლოს მოსამართლე ეკა არეშიძემ, 6-თვიანი დახურული სასამართლო განხილვის შემდეგ, ხორავას ქუჩაზე მოკლული №51 სკოლის მოსწავლეების, ლევან დადუნაშვილისა და დავით სარალიძის მკვლელობის საქმეზე სარეზოლუციო ნაწილი გამოაცხადა და დავით სარალიძის მკვლელობაში ბრალდებულს მუხლი გადაუკვალიფიცირა. ის დამნაშავედ არა განზრახ მკვლელობაში, არამედ მცდელობაში სცნო. მეორე ბრალდებულიც სარალიძის მკვლელობაში უდანაშაულოდ გამოაცხადა, ხოლო დადუნაშვილის მკვლელობაში სრულიად დამნაშავედ სცნო. ამ გადაწყვტილებას ზაზა სარალიძის მხრიდან აქციების დაწყება მოყვა. მან მოსახლეობას მოუწოდა, რომ გვერდით დადგომოდნენ.
ხორავას ქუჩაზე ორი მოზარდი 2017 წლის 1-ელ დეკემბერს დაჭრეს. ერთი მოზარდი საავადმყოფოში მიყვანამდე გარდაიცვალა, მეორე მოზარდი კი, ექიმების მცდელობისა და რამდენიმე ოპერაციის ჩატარების მიუხედავად, 2 დეკემბერს, საავადმყოფოში დაიღუპა. განზრახ მკვლელობის მუხლით დაკავებულია 2 არასრულწლოვანი, ხოლო დანაშაულის დაფარვის მიზნით პასუხისგებაში 5 პირია მიცემული. საქმეზე სასამართლო პროცესები მიმდინარეობს.