“ერთიანი ნაციონალური მოძრაობის” ლიდერი ნიკა მელია “კურიერთან” საუბარში აცხადებს, რომ პარტიებს უფლება არ აქვთ სარალიძის ტრაგედია სათავისოდ გამოიყენონ.
ნიკა მელიას თქმით, ხორავას ქუჩის საქმეზე რეალური დამნაშავეები უნდა გამოიკვეთოს. იგი აცხადებს, რომ მნიშვნელოვანია იმ ადამიანების დასჯა, რომლებიც დანაშაულს ხელს აფარებდნენ.
„ხელისუფლება თუ მზად არის, რომ საკუთარი თავი სისხლის სამართლის პასუხისგებაში მისცეს ან თავისი წარმომადგენელი, რომელიმე პოლიტიკური ლიდერი, კი ბატონო, დავაკვირდებით ამ პროცესებს. ჩვენ ამაზე ვისაუბრეთ დღეს და შევთანხმდით, რომ არცერთ პოლიტიკურ ოპოზიციურ პარტიას არ აქვს უფლება და არ უნდა ჰქონდეს უფლება, რომ ეს საპროტესტო აქციები, რომელიც მიმდინარეობს დედაქალაქის ცენტრში, გამოიყენოს საკუთარი ვიწროპარტიული ინტერესებისთვის,“ – განაცხადა ნიკა მელიამ.
შეგახსენებთ, გვიან ღამით, აქციაზე მისულ პრემიერ გიორგი კვირიკაშვილს სიტყვის თქმა არ აცალეს, ბოთლები ესროლეს და ის იძულებული გახდა დაეტოვებინა საპროტესტო აქცია. მანამდე ის ზაზა სარალიძესთან მივიდა, მიუსამძიმრა და გადაეხვია.
მოგვიანებით, მან კანცელარიაში ბრიფინგი გამართა და განაცხადა, რომ ვერ ხედავს გადადგომის მიზეზს. მან საქმის გამოძიება, რომლის გამოც დაიწყო არეულობა, შსს-ს გადასცა. კვირიკაშვილის თქმით, შს მინისტრ გახარიასთან ერთად ის პირადად მიადევნებს თვალს გამოძიებას.
მანამდე, საქართველოს მთავარი პროკურორი ირაკლი შოთაძე გადადგა. მან ეს გადაწყვეტილება ხორავას ქუჩის საქმეზე მოსამართლის გადაწყვეტილების შემდეგ მიიღო.
თბილისის საქალაქო სასამართლოს მოსამართლე ეკა არეშიძემ, 6-თვიანი დახურული სასამართლო განხილვის შემდეგ, ხორავას ქუჩაზე მოკლული №51 სკოლის მოსწავლეების, ლევან დადუნაშვილისა და დავით სარალიძის მკვლელობის საქმეზე სარეზოლუციო ნაწილი გამოაცხადა და დავით სარალიძის მკვლელობაში ბრალდებულს მუხლი გადაუკვალიფიცირა. ის დამნაშავედ არა განზრახ მკვლელობაში, არამედ მცდელობაში სცნო. მეორე ბრალდებულიც სარალიძის მკვლელობაში უდანაშაულოდ გამოაცხადა, ხოლო დადუნაშვილის მკვლელობაში სრულიად დამნაშავედ სცნო.
ხორავას ქუჩაზე ორი მოზარდი 2017 წლის 1-ელ დეკემბერს დაჭრეს. ერთი მოზარდი საავადმყოფოში მიყვანამდე გარდაიცვალა, მეორე მოზარდი კი, ექიმების მცდელობისა და რამდენიმე ოპერაციის ჩატარების მიუხედავად, 2 დეკემბერს, საავადმყოფოში დაიღუპა. განზრახ მკვლელობის მუხლით დაკავებულია 2 არასრულწლოვანი, ხოლო დანაშაულის დაფარვის მიზნით პასუხისგებაში 5 პირია მიცემული. საქმეზე სასამართლო პროცესები მიმდინარეობს.