კინომცოდნე გოგი გვახარია სოციალურ ქსელში ზაზა სარალიძის მხარდასაჭერ აქციას ეხმაურება.
“ეს ბავშვები, სკოლის მოწაფეები რა კარგად ლაპარაკობენ, გაოცებული ვარ. საერთოდ სხვა ენაა. როგორ აღწერა იმ ბიჭმა დაკითხვა პროკურატურაში. დაგვცინოდაო, ყვავილებს ხატავდაო. მანდ ნამყოფი ვარ და წარმოვიდგინე როგორც იქნებოდა
ამ ბავშვებს რომ უყურებ პატარა იმედი ჩნდება. ამ აქციის ფონი, მართალი გითხრათ, არ მაინტერესებს. ეგ აინტერესებდეს იმას, ვინც პირდაპირ თუ ძუძუთი მხარს უჭერს ხელისუფლებას, რომელმაც 6 თვე აწვალა მგლოვიარე მამა და ახლა ერთ დღეში ცდილობს სამართლიანობის აღდგენას “ნუ იქნება ოღონდ ბუნტის” განმეორებით.
ჰო, მართლა, “სუბალტერნი”, “სუბალტერნიო”, ფაშისტებზე რომ ამბობდით, შეხედეთ ამ აქციას. “სუბალტერნი”, თანაც ნამდვილი, სწორედ აქაა. სადა ხართ?”, – წერს გვახარია.
შეგახსენებთ, გვიან ღამით, აქციაზე მისულ პრემიერ გიორგი კვირიკაშვილს სიტყვის თქმა არ აცალეს, ბოთლები ესროლეს და ის იძულებული გახდა დაეტოვებინა საპროტესტო აქცია. მანამდე ის ზაზა სარალიძესთან მივიდა, მიუსამძიმრა და გადაეხვია.
მოგვიანებით, მან კანცელარიაში ბრიფინგი გამართა და განაცხადა, რომ ვერ ხედავს გადადგომის მიზეზს. მან საქმის გამოძიება, რომლის გამოც დაიწყო არეულობა, შსს-ს გადასცა. კვირიკაშვილის თქმით, შს მინისტრ გახარიასთან ერთად ის პირადად მიადევნებს თვალს გამოძიებას.
მანამდე, საქართველოს მთავარი პროკურორი ირაკლი შოთაძე გადადგა. მან ეს გადაწყვეტილება ხორავას ქუჩის საქმეზე მოსამართლის გადაწყვეტილების შემდეგ მიიღო.
თბილისის საქალაქო სასამართლოს მოსამართლე ეკა არეშიძემ, 6-თვიანი დახურული სასამართლო განხილვის შემდეგ, ხორავას ქუჩაზე მოკლული №51 სკოლის მოსწავლეების, ლევან დადუნაშვილისა და დავით სარალიძის მკვლელობის საქმეზე სარეზოლუციო ნაწილი გამოაცხადა და დავით სარალიძის მკვლელობაში ბრალდებულს მუხლი გადაუკვალიფიცირა. ის დამნაშავედ არა განზრახ მკვლელობაში, არამედ მცდელობაში სცნო. მეორე ბრალდებულიც სარალიძის მკვლელობაში უდანაშაულოდ გამოაცხადა, ხოლო დადუნაშვილის მკვლელობაში სრულიად დამნაშავედ სცნო.
ხორავას ქუჩაზე ორი მოზარდი 2017 წლის 1-ელ დეკემბერს დაჭრეს. ერთი მოზარდი საავადმყოფოში მიყვანამდე გარდაიცვალა, მეორე მოზარდი კი, ექიმების მცდელობისა და რამდენიმე ოპერაციის ჩატარების მიუხედავად, 2 დეკემბერს, საავადმყოფოში დაიღუპა. განზრახ მკვლელობის მუხლით დაკავებულია 2 არასრულწლოვანი, ხოლო დანაშაულის დაფარვის მიზნით პასუხისგებაში 5 პირია მიცემული. საქმეზე სასამართლო პროცესები მიმდინარეობს.