“როდესაც მე ავანთებ ხანუქას სანთელს ჩავიფიქრებ, რომ მშვიდობა ისრაელში, ყველა ებრაულ ოჯახში და საქართველოში იყოს”

პრემიერმინისტრმა გიორგი კვირიკაშვილმა ებრაელებს თბილისის მთავარ სინაგოგაში ხანუქის დღესასწაული მიულოცა და აღნიშნა, რომ საქართველოსა და ისრაელის 26-საუკუნოვანი მეგობრობა უნიკალურია.

„ჩემთვის უდიდესი პატივია, რომ დღეს მე მივმართო ჩვენთვის ყველაზე ახლობელი და ყველაზე დიდი ხნის მეგობარი ერის წარმომადგენლებს. მინდა მოგილოცოთ ეს ძალიან მნიშვნელოვანი დღესასწაული, რომლითაც აღინიშნება სიკეთის ბოროტებაზე გამარჯვება. ჩვენთვის, ქართველებისთვისაც ეს დღესასწაული სიმბოლურია და იქ , სადაც ჩვენ ვიმყოფებით, ამ უბანში, საქართველოში თავმოყრილია ყველა ტრადიციული რელიგიის წარმომადგენლობა. საქართველოსთვის 26-საუკუნოვანი მეგობრობა ნამდვილად უნიკალურია და ეს არის ის შემთხვევა, როდესაც ჩვენს ორ მოძმე ერს შორის არის უამრავი რამ საერთო. საერთო გვაქვს ისტორია, ბრძოლის ისტორიაც, როდესაც ქართველები იბრძოდნენ ებრაელთათვის და საქართველოში მცხოვრები ებრაელები იბრძოდნენ ქართველთათვის. მათ შორის ვიბრძოდით ერთმანეთის საკულტო რელიგიური ნაგებობების გადასარჩენადაც. ეს ისტორიები ყველას ახსოვს, ეს ისტორიები ოქროს ასოებით არის ჩაწერილი ჩვენს ორ ერს შორის მეგობრობის ძალიან ძვირფას წიგნში, რომელსაც როგორც ებრაელები, ასევე ქართველები გულში ინახავენ. მინდა გულით მოგილოცოთ ეს ძალიან მნიშვნელოვანი დღესასწაული, რომელიც ჩვენ ყველას გვიხარია. როდესაც მე ავანთებ ხანუქას სანთელს ჩავიფიქრებ, რომ ისრაელში იყოს მშვიდობა, ყველა ებრაულ ოჯახში იყოს მშვიდობა, საქართველოში იყოს მშვიდობა და მთელ მსოფლიოში არავის ენახოს ატირებული ბავშვები. ჩვენ გამოწვევებიც საერთო გვაქვს და იმედი მაქვს, რომ ჩვენს ერებს შორის ყველაზე ძვირფასი ფურცლები მომავალში კიდევ დაიწერება“, – განაცხადა გიორგი კვირიკაშვილმა.

დღეს თბილისის მთავარ სინაგოგაში ხანუქის დღესასწაულს აღნიშნავენ. ღონისძიებას საქართველოს პრემიერმინისტრი, მთავრობის წევრები, თბილისის მერი, დიპლომატიური კორპუსი, რაბინები და ებრაული თემის წარმომადგენლები ესწრებიან.