საპარლამენტო უმრავლესობის ლიდერმა, არჩილ თალაკვაძემ პარლამენტის პლენარულ სხდომაზე განაცხადა, რომ ბერი გაბრიელის ქუჩაზე ჩატარებული სპეცოპერაციის საქმეზე, პარლამენტის ნდობის ჯგუფის ფორმატში, უსაფრთხოების სამსახურს მოუსმენენ და ამ სპეცოპერაციის შესახებ მეტ ინფორმაციას მიიღებენ.
„სახელმწიფო უსაფრთხოების სამსახურმა და შინაგან საქმეთა სამინისტრომ ამ სპეცოპერაციის ორივე ამოცანა – მოსახლეობის დაცვაც და საფრთხის განეიტრალებაც დამაჯერებლად შეასრულეს. რა თქმა უნდა, ივანე გოლოშვილი გმირების ისტორიას სამუდამოდ დარჩება, მან მთელ ქვეყანას თავდადების მაგალითი მისცა და მისი ვაჟკაცობის წინაშე ქედს ვიხრით. როცა საქმე ტერორიზმსა და ეროვნულ უსაფრთხოებას ეხება, ბუნებრივია, ყველა კითხვას საჯარო პასუხი ვერ გაეცემა და ეს ჩვენმა კოლეგებმაც აღნიშნეს. მინდა, ოპოზიციონერ კოლეგებს შევახსენო, რომ სახელმწიფო მოსახლეობას ტერორიზმისგან იცავს მიუხედავად იმისა, თუ რა სახელი და გვარი აქვთ ტერორისტებს. ამიტომ აპელირება იმაზე, რომელ ტერორიზმს რა სახელი და გვარი, რა პასპორტი ჰქონდა, ამ შემთხვევაში მეორე ხარისხოვანია. ჩემთვის ცოტა გასაკვირია, როცა თქვენ გაცხადებულ მიზნად დასავლური სახელმწიფოს მშენებლობა გაქვთ, რომლის მაგალითები ისეთი ქალაქებია, როგორიცაა – ლონდონი, ბრიუსელი, პარიზი, სადაც სამწუხაროდ, ტერაქტებს ჰქონდა ადგილი და იქ პოლიტიკოსებისა და მოსახლეობის სოლიდარობა და კონსოლიდაცია ვნახეთ. სამწუხაროდ, აქ ამას ვერ ვხედავთ. მიმდინარე პერიოდში, ოპოზიციის ერთი ნაწილი ძალიან კორექტულ განცხადებებს აკეთებდა, მეორე ნაწილი ჩვენი სპეცსამსახურების მიმართ კრიტიკითა და თავდასხმებით გამოირჩევა, რაც მიუღებელია და ამ ადამიანების მიმართ ელემენტარული უმადურობაა“,- განაცხადა თალაკვაძემ.
შეგახსენებთ, 20 საათის განმავლობაში მიმდინარეობდა სპეცოპერაცია თბილისში, გაბრიელ სალოსის ქუჩაზე, საცხოვრებელ კორპუსში ჩასაფრებულ რამდენიმე სავარაუდო ტერორისტთან. სპეცოპერაციისას 1 სპეცრაზმელი დაიღუპა და 2 დაიჭრა. ბინაში გამაგრებული ყველა ტერორისტი ლიკვიდირებულია, მათ შორის, დღემდე ვარაუდებია, რომ იყო ახმედ ჩატაევი, რომელიც თავის დროზე ქართულმა მხარემ ციხიდან გაათავისუფლა.