ახალი ამბები მთავარი საზოგადოება

ხანძრების პრევენციისთვის ტყეები ადრეული გაფრთხილებისა და მონიტორინგის სისტემით აღიჭურვება

გარემოსა და ბუნებრივი რესურსების დაცვის სამინისტრო მომავალი წლიდან ტყეების ადრეული გაფრთხილებისა და მონიტორინგის სისტემით აღჭურვას გეგმავს.

ამის შესახებ ინფორმაციას, ეროვნული სატყეო სააგენტოს უფროსის მოადგილე ნათია იორდანიშვილი ავრცელებს.

იორდანიშვილის განცხადებით, უკვე მიმდინარეობს დონორებთან და ექსპერტებთან მოლაპარაკებები, როგორი ტიპის აღჭურვილობა რომელ რეგიონში უნდა განთავსდეს.

„ახალი ტექნოლოგიები საკმაოდ დიდ თანხებთან არის დაკავშირებული, თუმცა, რადგან გვაქვს დონორების მზაობაც და სახელმწიფოს მხრიდანაც მხარდაჭერა, ვარკვევთ ტექნიკურ პარამეტრებს ექსპერტებთან. დეკემბრის ბოლოს ჩამოვა იოჰან გოლდამერი, GIZ-ის წარმომადგენელი, რომელიც ჩვენ ამ პროცესში კონსულტაციას გვიწევს. სავარაუდოდ, დავიწყებთ იმ ხანძარსაშიში ზონებიდან, სადაც ვიცით, რომ გამკაცრებული მონიტორინგი გვჭირდება. სისტემა დაზოგავს ადამიანურ რესურსს.

ახლა მიმდინარეობს ხანძრის გამომწვევ მიზეზებზე გამოძიება და სტატისტიკასაც თუ გადავხედავთ დავინახავთ, რომ საკმაოდ ბევრი შემთხვევაა დაუდევრობით გამოწვეული. როგორც წესი, ყველა ასეთი ხანძარი ადამიანის დაუდევრობით ჩნდება. ამის პრევენციას ვერცერთი წინასწარი შეტყობინების სისტემა ვერ მოახდენს, ვინ სად დატოვებს კოცონს უყურადღებოდ, ან ვინ სად გადააგდებს სიგარეტის ნამწვს. წინა წლებში ვცდილობდით, რომ რაღაც კამპანიები გვეწარმოებინა, რომ არ დაეტოვებინათ უყურადღებოდ კოცონი, განვათავსეთ საინფორმაციო დაფები საპიკნიკე ადგილებთან ახლოს, სადაც გარკვევით წერია, რომ კოცონის დატოვება კანონით ისჯება და ა.შ. მაგრამ უფრო აქტიური და აგრესიული კამპანიაა საჭირო პრევენციისთვის“, – აცხადებს იორდანიშვილი.

რაც შეეხება სისტემის დამონტაჟების სავარაუდო ადგილებს, როგორც იორდანიშვილი აცხადებს, მონიტორინგი მაღალი ხანძარსაშიში კლასის რეგიონებში იგეგმება.

„სამცხე–ჯავახეთი, მცხეთა–მთიანეთი და კახეთი მაღალი ხანძარსაშიში კლასის რეგიონებია, როგორც კლიმატიდან, ასევე ტყის სახეობებიდან გამომდინარე. ამიტომ პირველ რიგში, ადრეული შეტყობინების და მონიტორინგის სისტემა სწორედ ამ რეგიონებში განთავსდება. იმედი გვაქვს, მომავალ წელს მოესწრება ამ სისტემის განთავსება. ჯერჯეროებით თანხები არ არის დათვლილი, ეს დამოკიდებულია ტექნოლოგიების სპეციფიკაზე, კამერის ტიპზე, განთავსების სქემაზე და ა.შ. სწორედ ამას ვაკეთებთ ახლა, ვმუშაობთ სპეციალისტებთან, რომ გავარკვიოთ რომელ პირობებში რა ტექნოლოგია იმუშავებს. მაგალითად, ლიტვაში რა აღჭურვილობაც ვნახეთ, ეს არ არის ძალიან ძვირიანი, მაგრამ ლიტვის ტყეების განლაგება სპეციფიურია, ხელისგულზეა ყველაფერი და ორი კამერა აკონტროლებს დიდ ფართობს. ჩვენს მთებში ასე ვერ გამოვა და მარტივად ვერ გადმოვიღებთ რომელიმე ქვეყნის მოდელს“, – აღნიშნა ნათია იორდანიშვილმა

წყარო: „ინტერპრესნიუსი“

სხვა ამბები

გიგა ჩხარტიშვილი – ნათია კაპანაძის გადაყენებით მრჩეველთა საბჭომ მიიღო ლოგიკური გადაწყვეტილება

newsadmin

ნინო ლომჯარია – “ოდირი“ აღნიშნავს, რომ მოსამართლეთა დანიშვნასთან დაკავშირებული პროცესი დაჩქარებულად მიმდინარეობს

newsadmin

“მე მაქვს დეპრესიული განწყობა, რომელიც მოსამართლეებთან დაკავშირებულმა პროცესმა”

newsadmin

“ნინო გვენეტაძის გადადგომის მიზეზებზე დამაჯერებელი პასუხები დღემდე არ მოგვისმენია” – ლომჯარია

newsadmin

“სამუშაო ჯგუფი, მედიაში სიძულვილის ენისა და ეკლესიის მიმართ კრიტიკულ განცხადებებს შეისწავლის”

newsadmin

“რეფორმები პოპულარული გადაწყვეტილებებით არ ტარდება, რეფორმები არაპოპულარულ ნაბიჯებს მოითხოვს”- გვენეტძე

newsadmin
იტვირთბა....