საქართველოს ჟურნალისტური ეთიკის ქარტია სამართალდამცავ უწყებებს მიმართავს, ჟურნალისტებისთვის ხელის შეშლის თითოეული ფაქტი დროულად გამოიძიონ და განცხადებას ავრცელებს:
„ქუთაისის 90-ე საარჩევნო უბანზე ტელეკომპანიების “რუსთავი 2-ის”, „იბერიის“ და „GDS-ის“ წარმომადგენლებს ფიზიკური შეურაცხყოფა მიაყენეს და აპარატურა დაუზიანეს. მარნეულში 48-ე საარჩევნო უბანზე ტელეკომპანია “იმედის” კამერა დაზიანდა. მომხდარზე გამოძიება არ დასრულებულა, შესაბამისად, კვლავაც არ დასჯილან დამნაშავე პირები. აქვე აღსანიშნავია ისიც, რომ საზოგადოებისთვის ასევე უცნობია, თუ ვინ მიაყენა ჟურნალისტებს ფიზიკური შეურაცხყოფა კორცხელში, 22 მაისს საკრებულოს შუალედური არჩევნების დროს მომხდარი დაპირსპირებისას. თითოეული ასეთი ფაქტის გამოუძიებლობამ და დამნაშავეთა დაუსჯელობამ შესაძლოა, წაახალისოს საზოგადოებაში სხვა მსგავსი ინციდენტები“, – ნათქვამია განცხადებაში.
საქართველოს ჟურნალისტური ეთიკის ქარტიის საბჭო სამართალდამცავ უწყებებს მიმართავს, დროულად გამოიძიონ თითოეული ფაქტი, საზოგადოებისთვის ცნობილი გახდეს ინფორმაცია დამნაშავეთა პასუხისმგებლობის შესახებ, რათა ყველამ იცოდეს, რომ ჟურნალისტის საქმიანობაში ხელშეშლა დაუშვებელია.
„მნიშვნელოვანია ისიც, რომ კენჭისყრის დღეს, 8 ოქტომბერს, გარდა ფიზიკური და სიტყვიერი შეურაცხყოფებისა, არაერთ ჟურნალისტს შეექმნა პრობლემა უშუალოდ საარჩევნო უბანზე მუშაობისას, რაც გამოწვეული იყო ძირითადად იმით, რომ საარჩევნო კომისიის წევრებს არ ჰქონდათ საკმარისი ინფორმაცია მედიის წარმომადგენელთა უფლებების შესახებ. სწორედ ამიტომ მნიშვნელოვანია არჩევნების მეორე ტურის წინ საარჩევნო პროცესთან პირდაპირ თუ ირიბად დაკავშირებულმა ყველა პირმა კარგად გაიაზროს ის უდიდესი როლი, რაც აკისრია მედიას არჩევნების გამჭვირვალედ და დემოკრატიულად ჩატარების პროცესში და ხელი შეუწყოს მათ თავისუფლად და უსაფრთხოდ მუშაობას“, – ნათქვამია განცხადებაში.