ფოტოგრაფი გოგა ჩანადირი სოციალურ ქსელში სტატუსს აქვეყნებს. ის ტრანსგენდერი ქალის დაჭრის ფაქტს ეხმაურება. შემთხვევა რამდენიმე დღის წინ მოხდა.
„ვუყურებ ოჯახებს და ვხედავ, როგორი მოძულებული ჰყავთ შვილი, რომელიც ქორწინების გარეშე შვილს აჩენს, რომელიც სექსუალურ უმცირესობას წარმოადგენს, რომელიც ფეხმძიმედაა და აბორტის გაკეთებას აიძულებენ და ასე შემდეგ. ოჯახი თავად ხდება მოძალადე, მსხვერპლი კი ოჯახის წევრი.
ახლა გავიგე, რომ ტრანსგენდერი, რომელიც ცოტა ხნის წინათ მძიმედ დაჭრეს, ოჯახის წევრები შინ არ უშვებდნენ. ახლახანს გავიგე, რომ კახეთში შვილს მუცელი მოაშლევინეს, რადგან ქმარი არ ჰყავდა. სამეგრელოში ცოლი სცემეს მხოლოდ იმიტომ, რომ ქმარი არ იყო დარწმუნებული მის ქალიშვილობაში.
იმერეთშიც, ქართლშიც, სვანეთშიც და ყველგან იგივე ხდება. არ ვიცი, რა ხდება. ოჯახები საზოგადოებრივი აზრის ტყვეობაში ექცევიან, რომელიც მსგავს რამეებს კრძალავს.
და ვინ დაადგინა, რომ ეს აზრია ჭეშმარიტი ან ამ საზოგადოების წევრია უცოდველი? ვინ განსაზღვრა, რომ ქორწინების გარეშე ბავშვის გაჩენა უფრო დიდი ციდვაა, ვიდრე აბორტი? ვინ განსაზღვრა, რომ მოძალადე უფრო უცოდველია, ვიდრე გარემოებათა მსხვერპლი? შეუშვით თქვენი შვილები სახლში და უარი თქვით აბორტებზე! მოექეცით ადამიანებს ადამიანურად და არა ისე, როგორც თქვენ არ გინდათ, მოგექცნენ“,-წერს ფოტოგრაფი.
ტრანსგენდერი ქალის მდგომარეობა კვლავ მძიმეა, – ამის შესახებ “მეტრონომს” „ნიუს ჰოსპიტალსში“ განუცხადეს. საავადმყოფოს პრესსამსახურის ინფორმაციით, დაჭრილი რეამინაციაშია და მართვით სუნთქვაზე იმყოფება. შეგახსენებთ, 14 ოქტომბერს ორთაჭალის ტერიტორიაზე ტრანსგენდერ ქალს თავს დაესხნენ. მას თავისა და ყელის არეში მრავლობითი დაზიანებები აქვს მიყენებული.