შუაღამისას სოფელ ტბეთში 32 წლის მამაკაცი დანით საკუთარ სახლში მოკლეს.
ადგილობრივი მოსახლეობა ამბობს, რომ მალხაზ პაქსაძის მკვლელობაში რამდენიმე ადამიანი მონაწილეობდა. ცხედარს სხეულზე 20-მდე ჭრილობა აქვს მიყენებული.
ამ დროს სახლში იმყოფებოდა მოკლულის მეუღლე, საჭირო გახდა მისი საავადმყოფოში გადაყვანა, თუმცა ექიმების თქმით, პაციენტს დაზიანებები არ აღენიშნება.
მომხდარის შემდეგ ადგილობრივმა მოსახლეობამ მკვლელობაში ერთ-ერთი ეჭვმიტანილის სახლს ბენზინი გადაასხა და გადაწვა.
შინაგან საქმეთა სამინისტროს ინფორმაციით, დაკავებულია 2 ეჭვმიტანილი. მათ წინააღმდეგ საქმე ორი მუხლით არის აღძრული, ერთ-ერთი მათგანი განზრახ მკვლელობაა.
დანაშაულის მოტივად ყოფითი პრობლემები სახელდება. მკვლელობის ადგილზე კრიმინალისტები ამ დრომდე მუშაობენ.
