თურქეთის პრეზიდენტმა რეჯეპ თაიფ ერდოღანმა ქვეყანაში მომხდარი სამხედრო გადატრიალების მცდელობასთან კავშირში აშშ-ის შეიარაღებული ძალების ცენტრალური სარდლობის მეთაური, გენერალური ჯოზეფ ვოტელი დაადანაშაულა, – ამის შესახებ ბრიტანული სამაუწყებლო კომპანია „ბიბისი“ იტყობინება.
ერდოღანის მტკიცებით, ვოტელმა მეამბოხეებს მხარდაჭერა გამოუცხადა და თურქეთი სამხედრო მაღალჩინოსნების დაკავების გამო გააკრიტიკა.
„ვინ ხარ შენ? იცოდე შენი ადგილი და იცოდე, რას წარმოადგენ! იმის ნაცვლად, რომ მადლობა გადაუხადო ქვეყანას, რომელმაც დემოკრატიული გზით ჩაახშო აჯანყება, მისი ორგანიზატორების მხარეს იკავებ“, – მიმართა ერდოღანმა ამერიკელ გენერალს.
აღნიშნულ ბრალდებას ჯოზეფ ვოტელი გამოეხმაურა და განაცხადა, რომ მას სამხედრო გადატრიალების მცდელობასთან არანაირი კავშირი არ აქვს.
„ნებისმიერი ინფორმაცია, რომ თურქეთში სახელმწიფო გადატრიალების მცდელობასთან მქონდა რაიმე კავშირი, სიმართლეს არ შეესაბამება“, – განაცხადა ამერიკელმა გენერალმა.