აშშ-ს პრეზიდენტი ბარაკ ობამა ამერიკის პირველი მოქმედი პრეზიდენტია, რომელიც 1945 წელს ამერიკული ავიაციის მიერ ბირთვული დაბომბვის შემდეგ იაპონიის ქალაქ ჰიროშიმაში ჩავიდა.
„71 წლის წინ ერთ უღრუბლო დილას, სიკვდილი ციდან ჩამოვარდა და მსოფლიო შეცვალა“ – განაცხადა ობამამ ჰიროშიმას მშვიდობის მემორიალურ პარკში, რომელიც მან ყვავილებით შეამკო.
აპრილში ჰიროსიმაში აშშ-ის სახელმწიფო მდივანი ჯონ კერი იმყოფებოდა. ჯონ კერიმ ბირთვული აფეთქების მსხვერპლთა ხსოვნისადმი მიძღვნილი მემორიალი ყვავილებით შეამკო და სტუმრების წიგნში ჩანაწერი დატოვა. კერი პირველი სახელმწიფო მდივანი გახდა, რომელიც ჰიროსიმაში ჩავიდა. მისი თქმით, ის ამაყობს ამით.
1984 წელს ჰიროსიმაში აშშ-ის ყოფილი პრეზიდენტი ჯიმი კარტერი იმყოფებოდა, თუმცა ვიზიტის დროს კარტერი პრეზიდენტის თანამდებობას უკვე აღარ იკავებდა.
1945 წლის 6 აგვისტოს ჰიროსიმას დაბომბვა ისტორიაში ბირთვული იარაღის საბრძოლო მიზნებისათვის გამოყენების პირველი შემთხვევა გახდა. ბირთვულ აფეთქებას 130 ათასამდე ადამიანი ემსხვერპლა. კიდევ 100 ათასზე მეტი ადამიანი დაბომბვის შემდეგ ნახევარი წლის განმავლობაში გარდაიცვალა.