უკრაინაში დაიღუპა კანადის მოქალაქე, ცხოველების უფლებადამცველი, მოხალისე, ორგანიზაცია RainCoast Dog Rescue Society-ს დამფუძნებელი ჯესი ადამსი.
ჯესი ადამსი საომარ ზონაში ცხოველების გადარჩენაზე ზრუნავდა. ბოლო სამ თვეზე მეტი ხნის განმავლობაში იგი დონბასის რეგიონში, მაღალი რისკის ზონაში იმყოფებოდა და ორგანიზაცია Animal Rescue Kharkiv-თან ერთად მუშაობდა.
იგი ტრაგიკულად დაიღუპა მას შემდეგ, რაც უკრაინის ქალაქ კრამატორსკში რუსული დრონი მის სატრანსპორტო საშუალებას დაეჯახა.
„კვირას, 25 ოქტომბერს, ჯესი კრამატორსკიდან ცხოველების ევაკუაციას ახორციელებდა. დრონი თავს დაესხა ჩვენს ევაკუაციის მანქანას, რომელიც დატვირთული იყო გადარჩენილი ცხოველებით. დრონი პირდაპირ საქარე მინას შეეჯახა. ჯესი მძიმედ დაშავდა და დაუყოვნებლივ გადაიყვანეს ადგილობრივ საავადმყოფოში. ჩაუტარდა გულ-ფილტვის რეანიმაცია და გადაუდებელი ოპერაცია, მაგრამ სამწუხაროდ, ყველა მცდელობის მიუხედავად, მისი სიცოცხლის გადარჩენა ვერ მოხერხდა“ – წერს ტელეგრამზე ორგანიზაცია Animal Rescue Kharkiv.
ცხოველთა უფლებადამცველი ორგანიზაციების ცნობით, ჯესი ადამსმა ასობით ცხოველის – ძაღლების, კატების, ძროხების, თხების, შინშილებისა და კუების ევაკუაციასა და გადარჩენაში მიიღო მონაწილეობა. იგი მუშაობდა ფრონტის ხაზთან ახლოს მდებარე, განსაკუთრებული რისკის შემცველ დასახლებებში, რომლებიც მუდმივად რუსეთის თავდასხმის ქვეშაა.