20 ოქტომბერს საფრანგეთის მთავრობამ საგანგებო შეხვედრების მორიგი სერია დანიშნა, მათ შორის მოლაპარაკებები მსხვილი სოციალური მედიის პლატფორმების წარმომადგენლებთანაც დაიგეგმა.
პრემიერმინისტრმა სებასტიენ ლეკორნუმ განაცხადა, რომ საფრანგეთი ახალ კომენდანტის საათს დააწესებს იმ ზონებში, სადაც ამის საჭიროება იქნება. მან ასევე დაამატა, რომ წინა დღეს რამდენიმე ქალაქში მიღებულმა მსგავსმა ზომებმა “ღამის განმავლობაში სიმშვიდის შენარჩუნებას ხელი შეუწყო”.
19 ოქტომბერს საფრანგეთის ხელისუფლებამ პარიზსა და რამდენიმე სხვა ქალაქში ნაწილობრივი კომენდანტის საათი გამოაცხადა.
“მიზნობრივმა კომენდანტის საათმა ღამის განმავლობაში სიმშვიდის შენარჩუნებას ხელი შეუწყო […] ამაღამ ახალი კომენდანტის საათის შემოღება გადაწყდება იქ, სადაც ვითარება მოითხოვს. ამ გადაწყვეტილებებს ადგილზე, მერიებთან კოორდინაციით, პრეფექტები მიიღებენ”. – დაწერა ლეკორნუმ X-ზე.
პოლიციამ დაადასტურა, რომ საფრანგეთში ღამემ სერიოზული ინციდენტების გარეშე ჩაიარა.
თუმცა ზოგიერთი შეზღუდვა, როგორიცაა პარიზში მოქმედი ზომები, თავდაპირველად მხოლოდ ორშაბათიდან სამშაბათის ღამემდე ვრცელდებოდა, სხვები, განსაკუთრებით ბორდოსა და ნიცაში, რამდენიმე დღის განმავლობაში უნდა დარჩენილიყო ძალაში.
ღამის განმავლობაში არეულობის ერთ-ერთ ეპიცენტრს, პარიზის რესპუბლიკის მოედანს, ვერტმფრენი აკონტროლებდა, რომელიც მოედანს მძლავრ პროჟექტორს ანათებდა.
ლიონში, დემონსტრაციების აკრძალვის მიუხედავად, 19 ოქტომბრის საღამოს დაახლოებით 500 ადამიანი შეიკრიბა გადამწვარი ტურიზმის ოფისის წინ, რათა მხარდაჭერა გამოეხატათ დარბევის შედეგად დაზარალებული მაღაზიის მეპატრონეებისთვის,
ფინანსთა მინისტრმა როლან ლესკიურმა მაღაზიის მეპატრონეებისა და ხელოსნების მხარდამჭერი ზომების მიღების პირობა დადო.
ცნობისთვის, საფრანგეთის მასშტაბით, დემონსტრანტები ცხოვრებისა და საწვავის ხარჯების ზრდას აპროტესტებენ, რაც სკოლებში უკეთესი პირობების მოთხოვნით დაწყებული სტუდენტური პროტესტის გაგრძელებაა.
საფრანგეთის ხელისუფლებამ აღიარა, რომ სტუდენტების ზოგიერთი მოთხოვნა ლეგიტიმურია, თუმცა დაგმო ურბანული ძალადობა. მთავრობამ ასევე დაადანაშაულა ულტრამემარცხენე პარტია la france insoumise (“დაუმორჩილებელი საფრანგეთი”) დემონსტრაციების გაღვივებაში. პარტიამ აღნიშნული ბრალდება უარყო.
მოძრაობის ერთ-ერთი მთავარი ორგანიზატორი სტუდენტური გაერთიანების განცხადებით, სტუდენტების უკმაყოფილება მოძველებული ინფრასტრუქტურით, გადატვირთული საკლასო ოთახებით, გადატვირთული განრიგით, მასწავლებლებისა და პერსონალის დეფიციტითა და სკოლების არასაკმარისი დაფინანსებით არის გამოწვეული.
თანამდებობის პირების განცხადებით, მრავალი დემონსტრაცია მშვიდობიანად დაიწყო, თუმცა მოხდა ესკალაცია, როდესაც მომიტინგეებმა გამოიყენეს სასროლი პიროტექნიკა და თავს დაესხნენ სკოლებსა და სხვა ინფრასტრუქტურას, რამაც მილიონობით დოლარის ზარალი გამოიწვია
განათლების მინისტრმა ედუარ ჟეფრემ ოქტომბრის დასაწყისში France 2-ს განუცხადა, რომ სულ მცირე 24 სკოლა დაარბიეს ან ცეცხლი წაუკიდეს.
ამასთან, 17 ოქტომბერს რეგიონის უმაღლესმა თანამდებობის პირმა ფრანგულ საინფორმაციო სააგენტო Agence France-Presse-ს (AFP) განუცხადა, რომ ნიღბიანი მომიტინგეების მიერ გაჩენილი ხანძრის შედეგად, საფრანგეთის ქალაქ ლიმოჟის მერიის შენობა “ძირითადად განადგურდა”.
საფრანგეთის თანამდებობის პირების ცნობით, თითქმის 8 000 ადამიანია დაკავებული, ხოლო დაახლოებით 900 პოლიციელი და 350-ზე მეტი სტუდენტი და თანამშრომელი დაშავდა.
ამასთან, 19 ოქტომბერს მაკრონის ადმინისტრაციამ განაცხადა, რომ საფრანგეთის შინაგან საქმეთა მინისტრმა, ლორან ნიუნიესმა, არეულობების შემდეგ, პრეზიდენტს გადადგომის თხოვნით მიმართა.
ელისეს სასახლის ცნობით, მაკრონმა მინისტრის გადადგომაზე უარი თქვა და ნიუნიესს მოუწოდა, სასწრაფოდ შეიმუშაოს ახალი მიდგომები “ბარიკადებისა და ძარცვის აღსაკვეთად”.
იუსტიციის მინისტრმა ჟერალდ დარმანენმა მხარი დაუჭირა პრეზიდენტის მოწოდებებს და ტელეკომპანია France 2-ს განუცხადა, რომ დაზვერვის ხარვეზებმა სახელმწიფო მოწყვლადი დატოვა “მემარცხენე ექსტრემისტი” მეამბოხეების წინაშე.