სახალხო დამცველის განცხადებით, ქალთა მიმართ ძალადობასთან დაკავშირებული რეალობა შემაშფოთებელია და მიუხედავად იმისა, რომ სახელმწიფოს მხრიდან არაერთი პრევენციული ზომა გატარდა, პრობლემა კვლავ მწვავეა.
„ქალთა მიმართ ძალადობის და მკვლელობის თვალსაზრისით არსებული რეალობა განსკუთრებულ შეშფოთებას იწვევს. 2015 წელს გამოცემული შემაკავებელი ორდერების მიხედვით, ოჯახში ძალადობის 2 726 ფაქტი გამოვლინდა, სადაც 5 106 პირი მონაწილეობდა. საქართველოს მთავარი პროკურატურის მონაცემებით, რომელიც გადმოგზავნილია ჩვენს აპარატში, 2015 წელს ქალთა მკვლელობის და მკვლელობის მცდელობის 28 შემთხვევა გამოვლინდა, აქედან 16 შემთხვევა ოჯახში ძალადობის პირობებში იქნა ჩადენილი, 12 შემთხვევა სხვა მოტივით. შემთხვევათა უმრავლესობა ჩადენილია პარტნიორი, ყოფილი პარტნიორის ან პირის მიერ, რომელსაც უარი ეთქვა პარტნიორულ ურთიერთობაზე. კვლავ გვხდება აბორტის ისეთი ფორმა, როგორიც გენდერული ნიშნით სქესის სელექციაა. დღემდე პრობლემას წარმოადგენს ადრეულ ასაკში ქორწინების პრევენცია და შემთხვევების მართვა. 2015 წელს 611 არასრულწლოვნის ქორწინება დარეგისტრირდა, ოჯახის შექმნის მიზნით კი სწავლა 13-დან 17 წლამდე 408 მოსწავლემ შეწყვიტა“, – ამის შესახებ უჩა ნანუაშვილმა განაცხადა, რომელიც საკუთარ ანგარიშს არასამთავრობო ორგანიზაციებს აცნობს.