კრისტა პაიკის ადვოკატის განცხადებით, სიკვდილით დასჯის წარუმატებელი მცდელობის შემდეგ, მსჯავრდებული “გაბრაზებული და დაბნეულია”. ადვოკატ რენდი სპაივის თქმით, გაღვიძების შემდეგ პაიკის პირველი სიტყვები იყო: “სად ვარ?“ და “ვინ ხარ შენ?“.
- 50 წლის პაიკს 1995 წელს 19 წლის კოლინ სლემერის მკვლელობისთვის სასიკვდილო განაჩენი გამოუტანეს. 30 სექტემბერს იგი ლეტალური ინექციის 2 დოზას გადაურჩა. ექსპერტების განცხადებით, ის აშშ-ში ერთადერთი ადამიანია, ვინც ლეტალური ინექციის შემდეგ გადარჩა.
პაიკი საავადმყოფოში გადაიყვანეს, სადაც რამდენიმე დღის განმავლობაში უგონო მდგომარეობაში იმყოფებოდა. მისი ადვოკატები ფიქრობდნენ, რომ ვეღარ გაიღვიძებდა, თუმცა სამშაბათს ქალმა საუბარი შეძლო.
პაიკს პროცედურის შესახებ მხოლოდ რამდენიმე დეტალი ახსოვს. მისი თქმით, სასიკვდილო ინექციის ჯგუფს ვენის პოვნაში თავად დაეხმარა, შემდეგ კი საავადმყოფოში გაიღვიძა.
“არ ვიცით, რა გავლენას მოახდენს ეს ყველაფერი მის ფსიქიკურ ჯანმრთელობაზე“, – განაცხადა ადვოკატმა და აღნიშნა, რომ პაიკი მომხდარის გამო “გაბრაზებული და დაბნეულია“.
- სასამართლომ ტენესის შტატს დაავალა, შეენარჩუნებინა სიკვდილით დასჯის წარუმატებელი მცდელობის ყველა მტკიცებულება, მათ შორის კათეტერები, შპრიცები და სხვა მასალები. ადვოკატების განცხადებით, ეს მტკიცებულებები შესაძლოა მომავალში შტატის წინააღმდეგ სამართლებრივი დავის საფუძველი გახდეს.
ტენესის გუბერნატორმა ბილ ლიმ შტატში სიკვდილით დასჯა წლის ბოლომდე შეაჩერა. ამასთან, თანამდებობას ტოვებს შტატის ციხის უფროსიც.