პოლონეთი უკრაინასთან საზღვრის გაძლიერებას გეგმავს და ლუბლინის რეგიონში Abrams-ის ტიპის ტანკებსა და „პეტრიოტის“ ტიპის სისტემებს გაგზავნის. ამის შესახებ პოლონეთის თავდაცვის მინისტრმა, ვლადისლავ კოსინიაკ-კამიშმა განაცხადა.
„რამდენიმე კვირის წინ მივიღე გადაწყვეტილება ლუბლინის რეგიონში „პეტრიოტის“ ბატარეების განლაგების შესახებ. ვაპირებ, ვესტუმრო აქ განლაგებულ სამხედროებს, რომლებიც რეგიონის დაცვას უზრუნველყოფენ. ეს არის პირველი შემთხვევა, როდესაც „პეტრიოტის“ ბატარეები ლუბლინის რაიონში განთავსდა“, – განაცხადა პოლონეთის თავდაცვის მინისტრმა.
მისივე თქმით, გადაწყვეტილება მიიღეს პოლონეთის შეიარაღებული ძალების ქვედანაყოფების გაფართოების შესახებაც. კერძოდ, შეიქმნება ახალი მექანიზებული ბრიგადა, განთავსდება უპილოტო საფრენი სისტემების ბრიგადა, ბატალიონი და „პეტრიოტის“ სისტემით აღჭურვილი დამატებითი საჰაერო თავდაცვის ქვედანაყოფი.
პოლონეთის თავდაცვის მინისტრის თქმით, ეს ღონისძიებები მნიშვნელოვნად გააძლიერებს რეგიონის თავდაცვისუნარიანობას.