80 წლის რუსულმა ტანკმა ფრონტამდე 9 000 კილომეტრი გაიარა – შემდეგ კი ის უკრაინულმა დრონმა გაანადგურა – ინფორმაციას უკრაინული მედია ავრცელებს და წერს, რომ T-54-ის შექმნიდან თითქმის რვა ათეული წლისა და შორეულ აღმოსავლეთში მდებარე რუსული შესანახი ბაზებიდან თითქმის 9 000-კილომეტრიანი მოგზაურობის შემდეგ, საბჭოთა ეპოქის ერთ-ერთმა ტანკმა საბოლოოდ მიაღწია დრონების თანამედროვე ბრძოლის ველს, სადაც ის უკრაინის 423-ე ცალკეულმა უპილოტო სისტემების პოლკმა, „სკიფმა გრიფონებმა“ 29 სექტემბერს გაანადგურა.
უკრაინელმა FPV დრონების ოპერატორებმა რუსულ T-54-ს ზურგში, საკმაოდ ღრმად დაარტყეს და ოპერაციის ამსახველი კადრებიც გაავრცელეს. რუსულ ძალებს მოძველებული ტანკი დამატებითი დამცავი კონსტრუქციებით ჰქონდათ გადახურული, რათა ის საჰაერო დარტყმებისგან დაეცვათ, თუმცა იმპროვიზებულმა დაცვამ FPV დრონი ვერ შეაჩერა.
ტანკი T-54 აღჭურვილია 100 მმ-იანი მთავარი ქვემეხით, რაც მას ერთ-ერთ ყველაზე ძველ სერიულად წარმოებულ ტანკად აქცევს მათ შორის, რომლებიც რუსეთმა გრძელვადიანი შენახვის ბაზებიდან გამოიყვანა და საომრად დააბრუნა.
„სკიფი გრიფონები“ მიიჩნევენ, რომ მსგავსი ძველი ჯავშანტექნიკის დაბრუნება რუსეთის ახალი ტანკებისა და საბრძოლო მასალის მარაგებზე არსებულ მუდმივ წნეხზე მიუთითებს.