ევროკავშირის საბჭომ სახელმწიფო დუმის არჩევნებიდან რუსეთის ოპოზიციური პარტია Яблоко-ს (“ვაშლი”) ჩამოშორებასა და მისი ლიდერების დევნაში მონაწილე 10 რუს მოსამართლესა და პროკურატურის წარმომადგენელს სანქციები დაუწესა.
სიაში მოხვდნენ რუსეთის უზენაესი სასამართლოს სამი მოსამართლე და გენერალური პროკურატურის წარმომადგენელი, რომლებიც Яблоко-სთვის 2026 წლის სექტემბრის არჩევნებში ფედერალური სიით მონაწილეობის აკრძალვის გადაწყვეტილებასთან იყვნენ კავშირში.
ევროკავშირის საბჭოს განცხადებით, Яблоко ერთადერთი პოლიტიკური პარტია იყო, რომელიც რუსეთის მიერ უკრაინის წინააღმდეგ დაწყებულ ომს ღიად ეწინააღმდეგებოდა.
სანქციები დაუწესდათ მოსამართლესა და პროკურორსაც, რომლებიც Яблоко-ს წევრი ოპოზიციონერი პოლიტიკოსის, ლევ შლოსბერგის, საქმეში ფიგურირებდნენ.
შლოსბერგს რუსეთის არმიის დისკრედიტაციისა და უკრაინის წინააღმდეგ ომთან დაკავშირებით ე.წ. ცრუ ინფორმაციის გავრცელებისთვის 11 წლითა და ერთი თვით პატიმრობა მიუსაჯეს.
სიაში ასევე მოხვდნენ Яблоко-ს სხვა ლიდერების, მაქსიმ კრუგლოვისა და ნიკოლაი რიბაკოვის, სასამართლო პროცესებში მონაწილე მოსამართლეები.
სანქცირებულ პირებს ევროკავშირში არსებული აქტივები გაეყინებათ, ხოლო ევროკავშირის მოქალაქეებსა და კომპანიებს მათთვის თანხის, ფინანსური აქტივებისა და სხვა ეკონომიკური რესურსების მიწოდება აეკრძალათ.