“რუსეთი, დეფიციტის შესავსებად ბენზინს ინდოეთისგან ყიდულობს” – მედია

რუსეთმა ინდოეთიდან ბენზინის იმპორტი დაიწყო, რათა შეამციროს საწვავის დეფიციტი, რომელიც უკრაინის მიერ მის ენერგეტიკულ ინფრასტრუქტურაზე თავდასხმების შედეგად არის გამოწვეული , – ინფორმაციას Reuters-ი ინფორმირებულ წყაროებზე დაყრდნობით ავრცელებს.

ერთ-ერთი წყაროს ცნობით, ინდოეთიდან რუსეთში სულ მცირე 60 000 მეტრული ტონა ბენზინი გაიგზავნა. სხვა წყაროს ცნობით, გაიგზავნა ორი ტანკერი, თითოეული 30 000-დან 40 000 ტონამდე ამანათებით.

მესამე წყაროს ცნობით, რუსეთი გეგმავს ყოველთვიურად 400 000 ტონა ბენზინის იმპორტს სხვადასხვა ქვეყნიდან, მათ შორის მეზობელი ბელარუსიდან, რომელიც უკვე ახორციელებს საწვავის ექსპორტს რუსეთში.

Reuters-ის ინფორმაციით, რუსეთში ბენზინის მოხმარება ზაფხულში დღეში მინიმუმ 110 000 ტონას შეადგენს.

კრემლმა გუშინ განაცხადა, რომ რუსეთი სხვა ქვეყნებთან კონტაქტში იმყოფება და საწვავის იმპორტს მისაღებ ფასებში განიხილავს.

მთავრობის მინისტრებთან და სხვა ოფიციალურ პირებთან კვირას გამართულ შეხვედრაზე რუსეთის პრეზიდენტმა ვლადიმერ პუტინმა აღიარა, რომ ნავთობგადამამუშავებელ ქარხნებზე უკრაინის მიერ დრონებით განხორციელებულმა თავდასხმებმა ზოგიერთ რეგიონში საწვავის დეფიციტი გამოიწვია, თუმცა, მისი თქმით, რუსეთი ამ საკითხს უმკლავდება.