„ქართული ოცნების“ საპატიო თავმჯდომარის, ბიძინა ივანიშვილის ვაჟის, ცოტნე ივანიშვილის განცხადებით, ამ ეტაპზე პოლიტიკაში საქმიანობის არანაირი ინტერესი არ აქვს.
ივანიშვილის განმარტებით, მისი ძირითადი ინტერესები დაკავშირებულია ფილოსოფიასა და ხელოვნების ისტორიასთან. მან აღნიშნა, რომ აკადემიურ დონეზე სწორედ ამ მიმართულებებს იკვლევს. გარდა ამისა, თქვა, რომ დიდი ხანია აქტიურად ხატავს, თუმცა საკუთარი შემოქმედების გასაჯაროებას ამ ეტაპზე არ გეგმავს.
მისივე თქმით, ის მხარს უჭერს ახალგაზრდების სხვადასხვა ინიციატივას და მსგავს ღონისძიებებს ხშირად სტუმრის სტატუსით ესწრება, თუმცა ეს პოლიტიკურ საქმიანობაში ჩართვას არ ნიშნავს.
„სხვათა შორის, ბევრჯერ დაისვა ეს საკითხი. საკმაოდ გადაჭრით ვიტყვი, რომ არანაირი ინტერესი არ მაქვს პოლიტიკაში ჩართვის. არასდროს მისაუბრია იმასთან დაკავშირებით რა მიმართულებით ვსწავლობ აკადემიურად იქნება თუ რას ვაკეთებ. ძალიან დიდი ხანია არ ვასაჯაროებ, მაგრამ ძალიან ბევრს ვხატავ. აკადემიური მიმართულებით ფილოსოფიასა და ხელოვნების ისტორიას ვიკვლევ, ეს არის ორი სფერო, რაც მაინტერესებს, ამის იქით ვგულშემატკივრობ მსგავსი ტიპის ინიციატივებს ჩვენი ახალგაზრდების მხრიდან. სტუმრის სტატუსით ვესწრები ამ ტიპის შეხვედრებს. პოლიტიკაში ჩართვის არანაირი ინტერესი არ მაქვს. ვცდილობ ბევრი ვიშრომო, თუმცა ამ ეტაპზე არაფერს ვასაჯაროებ ეს იქნება ტექნიკურად თუ კონცეპტუალურად მინდა უკეთ განვავითარო”, – განაცხადა ცოტნე ივანიშვილმა.
გარდა ამისა ცოტნე ივანიშვილმა უპასუხა ევროკავშირთან დაკავშირებულ კითხვასაც და განაცხადა, რომ საქართველოს სტრატეგიული მიზანი ევროკავშირში ინტეგრაცია უნდა იყოს, თუმცა, მისი შეფასებით, ეს პროცესი ქვეყნის ეროვნული იდენტობისა და ტრადიციების დაცვით უნდა წარიმართოს.