კიშინეუში გამართულ ევროპის საბჭოს წევრი ქვეყნების საგარეო საქმეთა მინისტრების შეხვედრაზე მოლდოვის პრეზიდენტმა, მაია სანდუმ, ევროკავშირის გაფართოებას კონტინენტის მშვიდობისა და უსაფრთხოების საკითხი უწოდა. მისი თქმით, გაფართოება მხოლოდ ტექნიკური ან პოლიტიკური პროცესი აღარ არის — ეს ევროპის უსაფრთხოებისა და დემოკრატიის დასაცავად აუცილებელი სტრატეგიული გადაწყვეტილებაა.
ევროკავშირის გაფართოება არის არა მხოლოდ პოლიტიკური გადაწყვეტილება, არამედ ეს არის ინვესტიცია მშვიდობასა და სტაბილურობაში მთელი კონტინენტისთვის. ჩვენი მიზანია, რომ მოლდოვა გახდეს ევროპული ოჯახის სრულუფლებიანი წევრი, რადგან ეს არის ერთადერთი გზა ჩვენი დემოკრატიის დასაცავად. ჩვენ არ ვითხოვთ შემოკლებულ გზებს. ჩვენ გვესმის, რომ გაწევრიანება ეფუძნება დამსახურებას. ჩვენ მზად ვართ შევასრულოთ საშინაო დავალება, გავატაროთ რთული რეფორმები მართლმსაჯულების სისტემაში და ვებრძოლოთ კორუფციას, რადგან ეს რეფორმები პირველ რიგში ჩვენს მოქალაქეებს სჭირდებათ. ამავდროულად, ევროკავშირის გაფართოება უნდა იყოს ორმხრივი პროცესი. ჩვენ გვჭირდება მკაფიო სიგნალები და მხარდაჭერა ჩვენი პარტნიორებისგან. დღეს, როდესაც რუსეთი ცდილობს ძალისმიერი მეთოდებით შეცვალოს საზღვრები, ევროკავშირის გაფართოება არის ყველაზე ძლიერი გზავნილი იმისა, რომ თავისუფალი სამყარო არ დაიხევს უკან ავტორიტარული რეჟიმების წინაშე. გაფართოება აღარ არის მხოლოდ ტექნიკური პროცესი, ეს არის ეგზისტენციალური აუცილებლობა ევროპის უსაფრთხოებისთვის, – განაცხადა სანდუმ.
დღეს ევროპის საბჭოს წევრი ქვეყნების საგარეო საქმეთა მინისტრების სხდომა გაიმართება – მოლდოვაშია საქართველოს საგარეო საქმეთა მინისტრი მაკა ბოჭორიშვილიც.
საქართველოს საგარეო საქმეთა სამინისტროს ცნობით, ბოჭორიშვილი კიშინეუში, ევროპის საბჭოს მინისტრთა კომიტეტის 135-ე სესიაში მიიღებს მონაწილეობას და სესიის მონაწილეებს სიტყვით მიმართავს.