ჰანტავირუსი არ ვრცელდება მარტივად შემთხვევითი კონტაქტებით, საზოგადოებრივ ადგილებში ყოფნით ან მოკლე ურთიერთობით – თავად დაავადება შეიძლება იყოს სერიოზული იმ ადამიანებისთვის, ვინც ინფიცირდება. საწყისი სიმპტომები ხშირად ჰგავს გრიპს და მოიცავს ცხელებას, კუნთების ტკივილს, თავის ტკივილს, გულისრევას, დაღლილობასა და სუნთქვის გაძნელებას,- ამის შესახებ ჯანდაცვის საკითხების ექსპერტი, ზაზა წერეთელი სოციალურ ქსელში წერს.
მისივე თქმით, 13 მაისის მდგომარეობით, ჰანტავირუსი დაფიქსირებულია 11 შემთხვევა, მათ შორის 8 ლაბორატორიულად დადასტურებული, 2 სავარაუდო და 1 დაუზუსტებელი შემთხვევა.
„ბოლო დღეებში საერთაშორისო საზოგადოებრივი ჯანმრთელობის უწყებები ყურადღებით აკვირდებიან იშვიათი ანდების ჰანტავირუსის (Andes hantavirus) აფეთქებას, რომელიც საკრუიზო გემ MV Hondius-ს უკავშირდება. 13 მაისის მდგომარეობით, დაფიქსირებულია 11 შემთხვევა, მათ შორის 8 ლაბორატორიულად დადასტურებული, 2 სავარაუდო და 1 დაუზუსტებელი შემთხვევა. მნიშვნელოვანია, რომ ბოლო განახლების შემდეგ ახალი შემთხვევები ან გარდაცვალებები აღარ დაფიქსირებულა, რაც მიუთითებს, რომ სიტუაცია შესაძლოა სტაბილიზაციისკენ მიდის.
გემი 10 მაისს ჩავიდა ტენერიფეში, რის შემდეგაც მგზავრები და ეკიპაჟის წევრები თავიანთ ქვეყნებში დაბრუნდნენ. პარალელურად, საზოგადოებრივი ჯანმრთელობის უწყებებმა დაიწყეს კონტაქტების მოძიება და მონიტორინგი, ხოლო გემზე უკვე მოქმედებდა დამატებითი პრევენციული ზომები ინფექციის გავრცელების შესამცირებლად.
ბევრს ბუნებრივად უჩნდება კითხვა: როგორ გადადის ჰანტავირუსი და უნდა ვღელავდეთ თუ არა?
ჰანტავირუსი ძირითადად ვრცელდება ინფიცირებული მღრღნელების შარდით, ნერწყვით ან განავლით დაბინძურებული მიკროსკოპული ნაწილაკების შესუნთქვის შედეგად. ამ შემთხვევას განსაკუთრებულს ხდის ის ფაქტი, რომ გავრცელებული შტამი – ანდების ჰანტავირუსი – დღეისთვის ერთადერთი ცნობილი ჰანტავირუსია, რომელსაც ადამიანიდან ადამიანზე გადაცემის უნარი აქვს.
თუმცა ეს ხდება მხოლოდ ძალიან სპეციფიკურ პირობებში – როგორც წესი, საჭიროა ახლო და ხანგრძლივი კონტაქტი ინფიცირებულ პირთან, ხშირად დახურულ გარემოში. ვირუსი არ ვრცელდება მარტივად შემთხვევითი კონტაქტებით, საზოგადოებრივ ადგილებში ყოფნით ან მოკლე ურთიერთობით.
აღსანიშნავია, რომ ეს შტამი ძირითადად სამხრეთ ამერიკაში გვხვდება, და რაც განსაკუთრებით მნიშვნელოვანია – ევროპაში არ არსებობს ის ბუნებრივი მღრღნელი რეზერვუარი, რომელიც ვირუსის მუდმივ ცირკულაციას უზრუნველყოფს, ამიტომ საზოგადოებაში მისი ფართო გავრცელება ნაკლებად სავარაუდოა.
ზოგიერთს გაუჩნდა კითხვა – შეიძლება თუ არა ეს იყოს „შემდეგი პანდემია“?
საზოგადოებრივი ჯანმრთელობის ექსპერტების პასუხი მკაფიო პასუხია – არა. COVID-19-ისა და SARS-ისგან განსხვავებით, ანდების ჰანტავირუსი ადამიანებს შორის ადვილად არ ვრცელდება. ადამიანიდან ადამიანზე გადაცემა იშვიათია და საჭიროებს ხანგრძლივ და მჭიდრო კონტაქტს და არა ჩვეულებრივ სოციალურ ურთიერთობებს.
ასევე მნიშვნელოვანი კითხვაა – შეიცვალა თუ არა ვირუსი ან გახდა უფრო საშიში?
ამ ეტაპზე არსებული გენეტიკური კვლევები დამაიმედებელია. ვირუსის გენეტიკური ანალიზი მიუთითებს, რომ ინფიცირებულებში აღმოჩენილი ნიმუშები დაკავშირებულია ინფექციის ერთ საწყის წყაროსთან და ძალიან ჰგავს სამხრეთ ამერიკაში უკვე ცნობილ ანდების ვირუსის შტამებს. ამჟამად არ არსებობს მტკიცებულება, რომ ვირუსი გახდა უფრო გადამდები ან უფრო მძიმე დაავადებას იწვევს.
თავად დაავადება შეიძლება იყოს სერიოზული იმ ადამიანებისთვის, ვინც ინფიცირდება. საწყისი სიმპტომები ხშირად ჰგავს გრიპს და მოიცავს ცხელებას, კუნთების ტკივილს, თავის ტკივილს, გულისრევას, დაღლილობასა და სუნთქვის გაძნელებას. ზოგიერთ შემთხვევაში დაავადება შეიძლება გადაიზარდოს მძიმე ფილტვის გართულებებში.
ევროპული საზოგადოებრივი ჯანმრთელობის უწყებების მთავარი გზავნილი კვლავ დამამშვიდებელია: ევროპის მოსახლეობისთვის რისკი ამჟამად ძალიან დაბალია.
მიუხედავად ამისა, ეს შემთხვევა კიდევ ერთხელ გვახსენებს, რამდენად მნიშვნელოვანია დაავადებათა ძლიერი ზედამხედველობის სისტემები, საერთაშორისო თანამშრომლობა და სწრაფი რეაგირება თანამედროვე, ერთმანეთთან მჭიდროდ დაკავშირებულ მსოფლიოში“,- წერს ზაზა წერეთელი.