სამხრეთ კორეის ეროვნული დაზვერვის სამსახურის (NIS) ინფორმაციით, ჩრდილოეთ კორეას ირანის მიმართ უჩვეულოდ თავშეკავებული პოზიცია აქვს და, როგორც ჩანს, ირანის რეჟიმისგან დისტანცირებას ცდილობს, რაც შესაძლოა, აშშ-სთან ურთიერთობის გაუმჯობესების მცდელობაზე მიუთითებდეს.
სეულის შეფასებით, ფხენიანს ირანისთვის კონფლიქტის დაწყების შემდეგ არც იარაღი ან სხვა დახმარება გაუგზავნია და არც საჯარო სამძიმარი გამოუცხადებია ირანის რეჟიმის ყოფილი უზენაესი ლიდერის, აიათოლა ალი ხამენეის დაღუპვის გამო.
ამასთან, ჩრდილოეთ კორეამ არ მიულოცა ხამენეის შვილს, მოჯთაბა ხამენეის, ქვეყნის ახალი უმაღლესი ლიდერის პოზიციაზე არჩევა.
დაზვერვის ინფორმაციით, ფხენიანი ასევე ერიდება აშშ-ს პრეზიდენტ დონალდ ტრამპის პირდაპირ კრიტიკას და კონფლიქტზე მხოლოდ შეზღუდულ განცხადებებს ავრცელებს.
სამხრეთ კორეელი კანონმდებლების შეფასებით, ეს სტრატეგია შესაძლოა, მიზნად ისახავდეს ახალი დიპლომატიური შესაძლებლობების შექმნას, მათ შორის, ჩინეთისა და აშშ-ს ლიდერებს შორის მოსალოდნელი შეხვედრის ფონზე.